পৃথিবী এহাত ইতিহাস রচনার ক্ষেত্রত এচুদিন বপতাই প্রাধান্য পেইলতা রাজার শাসনর কথা, রাজ্য বিজয় বারো রাজার চরিতর কথা। অহানাত আর আর বিষয় বারো মানুর কথা অসারে মূল্যায়ন নাইল। যেকোন জাত আহার পুল্লাপ ইতিহাসহান হারপিতে গেলেগা বিসারানি লাগতই ঔ জাতিস্বত্তার সৃষ্টির ইতিহাস, তার জীবনধারণ প্রণালি, যুগে যুগে জাত অহার পরিবর্তন প্রক্রিয়া, সাহিত্য-সংস্কৃতি, জাত অহার হাবি বারাদে রূপান্তরর লগে লগে ঔ জাতর লালফাম বারো মানুর চরিতাবলী; হাবি ইতিহাসর অংশ আকিহান
চেঙপুড়া অজা ভারত বাংলাত নাঙকাপা ডাকুলা অজাগ। গিরকর বাখান মাতিয়া লম নেই। গিরক মণিপুরে থাইয়া ডাকর বিদ্যা এহান হিকিছেগা। গিরকর গারিগর মাচুহান খানি মতিছে মাতিয়া লোকমুখে ‘চেঙপুড়া’ নাঙ থুয়াদিলা। গিরকর পরুয়াকনকি ইলাতা আওলেকির সালিয়া অজা, বাবুলোক অজা, গোলাপ অজা, পীতাম্বর অজাগাছি। বাবুলোক অজার পিতকগ ডাকুলা ধনে অজা। মাধবপুর লয়ার বপতা মানু চেঙপুড়া অজার শিষ্য। গিরকর গজে অনেক ওয়ারি আছে।
