আগেদে মণিপুরীয়ে (বিষ্ণুপ্রিয়া/ মেইতেই) পূর্বমুখী ডিগালি বাসগৃহ আকতা হঙকরলা উতাই ‘ইঞ্চৌঘর’ । এবাকাও ভিতরখুলর মণিপুরী গাঙেদে আগো-দুগো আহিত পরের। হাকতাক আহানাত বার্মাত্ত অকরিয়া সিলেট পেয়া মণিপুরীর (মেইতেই, পাঙাল বারো বিষ্ণুপ্রিয়া) গাঙেদে ঈঞ্চৌঘর য়াম অসিল, গরর অংতা-লাক্তা দেহিয়াই মণিপুরী গাঙহান চিনে পারলা
মণিপুরি (বিষ্ণুপ্রিয়া/মেইতেই) গাঙ বা লেইকির অবিচ্ছেদ্য অংশ আহান লেইফাম হান। মালঠেপগ, দৌর লেইশাংগ বারো ওয়ালাসাংগ এরে তিনগই মনিপুরি লেইফামর অঙ্গ। মালঠেপ কেন্দ্রিক রুহি-সংস্কৃতিলই কাদা-বারার আর-আর দাপারাঙত্ত মণিপুরি খানি তঙাল অয়া আসি, অনেক অমণিপুরি লেখকে এরে মালঠেপ সংস্কৃতি এহান অসমেত্ত হাচুরেসে বুলিয়া মাতেসি
বিষ্ণুপ্রিয়া মণিপুরি ঠারর লৌকিক এলার লুপা দিক আহান মাদৈ-সরারেলর এলা। মূলত বৈশাখ-জ্যৈষ্ঠ মাহাত ডিগল খরার সমেয়ত রাতি নুঙেই-নঙতলে ইমা-ইন্দোলে লপুকে সরারেল গিরকরাঙ বরণ মাগতেগা মাদৈ-সরারেলর এলা দিলা। এবাকাও কুন-কুন লয়াত বরণ-ডাহানির এলা পাল করতারা। দেবরাজ ইন্দ্র বরণর দৌগ, বৈদিক যুগর প্রধান দৌগ ইন্দ্র, ঋকবেদে হাবিত্ত য়াম শোলক/এলা আসেতা ইন্দ্রর নাঙে। বৈদিক যুগ লয়নির মাপাদেত্ত ইন্দ্র গিরকরাঙত বিষ্ণুর গুরত্ব বপনি অকরেসিল, তাপক-তাপক টেইপাঙ মানুয়ে বিষ্ণুরে ভগবান বুলিয়া নিঙকরানি অকরেসিতা।
