মিয়ানমারে আমার মানু - সুরজিত সিংহ শিশির (নিংশিং চে - ২০২৩)

আদিকালেত মানু জায়গা আহাত স্থায়ী ইয়া থানা নুয়ারিসি। প্রাচীন কালর মানু বিপদমুক্ত জীনার কাজে কালে কালে জায়গা বদলাসি, যেহাত থানি নুঙেই, যেহাত বিপদ আপদ নেই অহাত গিয়াসিগা। আস্তে আস্তে মানুয়ে ঘর হংকরানি, আতিয়ারর ব্যবহার, ফসল ফলানি হিকলা। বিপদ আপদে যেপাগা নিজে কালকরে পারলা অহাত জাগা আহাত স্থায়ী ইসিলা। এহান হুদ্দা প্রাচীনকালে না, এপাগাও এসারে ঘটনা ঘটের। ১৯৭১ সালে বাংলাদেশেত্ত ৭০ লাখর বেশি মানু(শরণার্থী)১ ইন্ডিয়াত গিয়াসিলাগা। তাঙর ভিতরে বপতাই ইন্ডিয়াত্ত ফিরিয়া নাহিসি। এসাদে ভিটাবাড়ি বেলিয়া যানার নজির নানান দেশ, জাতিগোষ্ঠীর ভিতরে অহরহ আসে। আমি বিষ্ণুপ্রিয়া মণিপুরিরতাও এসারে ঘটনা আহান ঘটেসিল। এরে ঘটনা এহানর কাজে আমি ভাগ আহান বাংলাদেশে, ভাগ আহান ইন্ডিয়াত বারো ভাগ আহান মায়ানমারে আসি। ইন্ডিয়া বাংলাদেশে আমি যেতা বিষ্ণুপ্রিয়া মণিপুরি আসি আমারতার ভিতরে মিলামিশি হবা, যোগাযোগও হবা। কিন্তু মায়ানমারেও যে আমার জাতর মানু আসি এহান হালকা পাতলা হুনলেও তাঙর ইতিহাস বারো কুরাঙ কিসারে আসি আমি হান নাপাসি। আজি মিয়ানমারে বিষ্ণুপ্রিয়া মণিপুরির ইতিহাস বারো এপাগা কিসারে আসি এহানর গজে ওয়ারি হুনিক। 

নংসাং দিন আগে আমার পূর্ব পুরুষ মণিপুরর লাম বেলিয়া সিলেটর মাটিত ঘর বাধেসিলা। বার্মা রাজা অলুংপায়া যবর শক্তিশালী শাসকগো আসিল। রাজা এগই ভারতইর আসাম, মণিপুর, বারো তৎকালীন বার্মার কাদাবারার জাগা সিয়াম, লাংজিয়াম, তানিনথায়ি, মনো, রাখাইন জাগা এহানি দখল করেসিল।২ ১৭৫৫-১৭৫৯ সাল পেয়া বার বার আক্রমণ করানির পর মণিপুর রাজ্য এহান শত্রু মোকাবেলায় দূর্বল অপরসিলাগা। ১৭৫৯ সালে মণিপুর রাজ্য এহান পুল্লাপ অলুংপায়ার দখলে গেলগা।৩ অত্যাচারী শাসক এগোর বেড়াজালেত বাঁচতে মণিপুরি জাতিগোষ্ঠী নিজর ঘর এরাদিতে বাধ্য ইসিলা। যুদ্ধবিগ্রহত্ত দুরি ইয়া থাইতে পালে পালে নানান জাগাত সিতারলা। পাল আহান আমার পূর্বপুরুষ যেতা সিলেটে আহিয়া ঘর পাতলা। আরাক পাল আহান কাছাড় রাজ্যে ঘর পাতলাগা। বারো আরাকতা মণিপুর জরমভিটাগো না এরাদিলা। মণিপুরি রাজ্য এহান জয় করানির পর অলুংপায়া রাজা এগোই মণিপুরেত্ত ২০০০ পরিবার বন্দী করে নেসিলগা।৪ যেতার ভিতরে বিষ্ণুপ্রিয়া, মৈতৈ বারো আর আর জাতিও আসিলা। মৈতৈ বারো বিষ্ণুপ্রিয়া মানু এতার সাকতাহান প্রায় মান্নামান্নি ইলেও ভাষা, সংস্কৃতি আলাদা। যেহানর কাজে মৈতৈ এতারে বার্মীজ এতাই কাথে (Kathe) বারো বিষ্ণুপ্রিয়া এতারে আক্কাবাত/আকাবাত (Akkabat) বুলিয়া আলাদা আলাদা নাঙে ডাকলা।৫ রাজা অলুংপায়ায় আহিলা বন্দী এতারে বিভিন্ন কামে লাগুয়াসিল। আকতারে রাজ পরিবারোর দাস-দাসী, আরাক আকতারে যুদ্ধর আট্টি, ঘোড়ার পরিচর্চার কাজে, কয়েকগোরে ফসলি বির কাম করানিৎ বারো পাঙকালপা অতারে যোদ্ধা হংকরেসিল। কাথে(মৈতৈ) বারো আক্কাবাত(বিষ্ণুপ্রিয়া) সৈন্য এতারে নিয়া হংকরানি ইসিল আলাদা আলাদা অশ্ববাহিনী। বার্মা রাজায় পরবর্তী যুদ্ধবিগ্রহে এরে অশ্ববাহিনী এতারেনো যুদ্ধ করেসিল। তাঙর একনিষ্ঠতা, রাজার প্রতি আনুগত্যতার কারণে হইতো বদাউ ফায়া(১৭৮২-১৮১৯) রাজার আমলে কাথে(মৈতৈ) বারো আক্কাবাত(বিষ্ণুপ্রিয়া) মন্ত্রী পদ আহান হংকরানি ইসিল। আক্কাবাতর কাজে যে পদ হান হংকরানি ইসিল অহান বার্মা ঠারে “আক্কাবাত মাইন উন(Akkabat Myin Wun)”। যেহার অর্থহান “আক্কাবাত অশ্বারোহী মন্ত্রী”।৬ 

১৮০১ সালর অহানদে চিকয়া আসিলা আক্কাবাত(বিষ্ণুপ্রিয়া) এতা বার্মাত স্বাধীন চলাচলর স্বাধীনতা পেইলা। রাজ্যহার হাবিত্ত গুরুত্বপূর্ণ প্রশাসনিক এলাকা “তামকসো (Tamok So)”এহাতউ সাধারণ বার্মীজর অসারে স্বাধীন ইয়া থানিকরানি বারো কামকাজ করানির স্বাধীনতা পেইলা।৭ মণিপুরেত্ত বার্মাত জিতেগা হাপ্তা আহান সময় লাগের। হাপ্তা আহান বন জঙ্গল ফাইট দিয়া নুয়া জাগা আহাত আমার মানু এতাই পিছ বুলিয়া আরতা মণিপুরে না আলয়লা। নুয়া ঠার, নুয়া সংস্কৃতি, নুয়া জাগা এতাহাবি নিজর করিয়া নিয়াসিলাগা। মাতানি অকরের আক্কাবাত মন্ত্রীত্ত পদ পানার পরে বার্মাত আমার মানু এতা স্থায়ী ইয়া থানির কাজে মনস্থির করলা। আক্কাবাত মন্ত্রী উ চন: বার্মা রাজ্যে যত আক্কাবাত মন্ত্রী ইসিলা অতার ভিতরে “উ চন (U Chone)” মন্ত্রী এগর অবদান বপ।৮ গিরক এগো তৎকালীন বার্মার রাজধানী মান্দালয়র গভর্নরগোর দায়িত্ব পাসিল। আক্কাবাত(বিষ্ণুপ্রিয়া) মন্দির স্থাপন, আক্কাবাত মানুর উন্নয়ণ বারো আর আর হবা কাম করেসিল। ১৮৮৩ সালে মান্দালয়ে ঐতিহাসিক “মহা দেপেইন মঠ (Maha Depeyin Monastery)” এগো প্রাচাত্যর কাঠামো রূপ দিয়া তা হংকরেসিল। যেগরে “আক্কাবাত মিনিস্টার মিঙ্গাই মঠ” নাঙেও চিনতারা। প্রাচীন বার্মার ইতিহাসে কাথে(মৈতৈ) এতার ইতিহাস নিয়াম পেইলেও আক্কাবাত(বিষ্ণুপ্রিয়া) এতার ইতিহাস পানা যবর চিল। মৈতৈর অসারে বিষ্ণুপ্রিয়া মণিপুরি এতা সংখ্যাগরিষ্ঠ নাইসিলা। 

ব্রিটিশ বিরোধী আন্দোলনে বার্মার দাঙর ভূমিকা আসে। বার্মা রাজা “থিবাউ”র আমলে তৃতীয় “এংলো-বার্মা” যুদ্ধ ইসিল। সময় এহাত আক্কাবাত মন্ত্রীগো আসিল উ চন গিরক এগো। যেগোরে মিনতি ইয়ার্জার উ চন (Minhti Yarzar U Chone) নাঙে ইতিহাসে উল্লেখ আসে। এরে মন্ত্রী এগোই “তাউং টুইনগাই” নাঙে ১২৬৫গো অশ্ব বাহিনীর দল আহাননো যুদ্ধ এহাত অংশ নেসিলগা।৯ মন্ত্রী গিরকে যেসারে আক্কাবাতর উন্নয়নে কাম করেসিল অসারে বার্মার কাজেও কাম করিসে। হারপানি অকরের মন্ত্রী এগো যবর সাহসী যুদ্ধাগো আসিল। এসারে যুদ্ধ বিগ্রহ লমিয়া ফিরিয়া আহিলে আক্কাবাত বারো কাথে এতারে পুরস্কার স্বরূপ ফসলি বি দেনা ইসিল।১০ কুরাঙ আসি আক্কাবাত? তিনহার জাগার নাঙ পানা অকরের যেহাত আক্কাবাত মানু আসিলা।১১ এরে তিনহানির ভিতরে লিনজিং জাগা এহাত অতীতে বেশিরভাগ আক্কাবাত আসিলা এহার নানান চিহ্নত পানা অকরের। জাগা এহাত পুরানা মন্দির, মান্ডপ আসে। এপাগাও ২০০ হানর মত পরিবার নিজরে আক্কাবাত দাবি করতারা।১২ ইন্দোবাংলা মণিপুরি এসোসিয়েশনে লাইভ ভিডিও প্রোগ্রাম আহাত লিনজিং গাঙে আসি আমার মানুর বর্তমান অবস্থাহান দেখেসিলাং। তাঙর থতাত্তো নিয়াম তথ্য পেইলাঙ। তাঙি এপাগাউ মণিপুরি কিছু ঐতিহ্য ধরিয়া থসি। ইন্দো বাংলা মণিপুরি এসোসিয়েশনর ধারণ করা লাইভ প্রোগ্রামর আলোকে তলহাত কয়েকহান তথ্য দেনা ইল,১৩ 

 ১। গিথানী ইবেমা: আমার অসারে তাঙিয়ৌ হাদ্দিন গিথানী ইমার পূজা করতারা। আমি হাপ্তাহাত আকদিন ঘটগোর পানি পাল্টিলেও তাঙি হারাদ্দিন ঘটগোর পানি পাল্টিতারা। তাঙরতা গিথানীগোর ভিতরে মুনি হমানি নিষিদ্ধ। তাঙর বিশ্বাসহান গিথানী এগো কুমারিগো। কাজেই কুমারি আগোর মন্দিরে মুনি হমানি চুমনেই। তাঙি গিথানীগরে তাঙর প্রধান দৌগো নিংকরতারা। অতায়া তাঙর হাব্বির ঘরে গিথানী ইবেমার মন্দির আসে। 

 ২। আবকপা( আমার ঠারে: আপকপা): আমি যেসারে সাগেই(পূর্বপুরুষ) নিঙকরিয়া বছরে আকমু মাছর ভোগ হাকররাং অসারে তাঙিয়ৌ বছরে আকমু আবকপা মন্দিরে মাছর ভোগ নিবেদন করতারা। আমার অসারে তাঙিয়ৌ মুর বুদ্দিয়া গিথানী, আবকপা দৌর পূজা করতারা। ৩। 

বিষু উৎসব: বিষু উৎসব এহান তাঙর ভিতরেও আসে। আমি বিষুর সময় যে ভোগ হাকররাঙ অতা পথহাত হাকরে দিয়া আহরাঙ। বার্মাত নিয়ম এহান খানি অলটিয়া ভোগ অতা আক্কাবাত বাদে অন্য জাতির মানুরে বিতরণ করেইতারা। তাঙর পূর্বপুরুষ গৌড়ীয় বৈষ্ণব ধর্মাবলম্বী ইলেও এপাগা তাঙি হাব্বি থারাভেদা বৌদ্ধ(Tharavada Buddhism) অনুসারী।১৪ তাঙি যে মণিপুরি অহানর প্রমাণ পানা অকরের গিথানী, আপকপার, বিষুর অসারে ধর্মীয় সংস্কৃতি দেখিয়া। কিন্তু এরে সংস্কৃতি মৈতৈয়েও পালন করতারা। তাইলে তাঙি যে বিষ্ণুপ্রিয়া মণিপুরি এহানর প্রমাণহান কিহান? এহার প্রমাণ পানা অকরতই তাঙর ভাষার ব্যবহার দেখিয়া। এপাগা খানি আলোচনা করিক তাঙর ঠার নিয়া। তাঙর প্রধান ঠারহান বর্মী(মায়ানমারর ভাষা) ইলেও ইমার ঠারর বাক্কা ওয়াই(শব্দ) তাঙি ব্যবহার করতারা। ১৭৯৯ সালে Dr. Francis Buchanan গিরকর লেখা "A comparative Vocabulary of some of the Languages spoken in the Burma Empire" লেরিকেতো বারো ইন্দো বাংলা মণিপুরি এসোসিয়েশনর লাইভ প্রোগ্রামেত্ত পানা ইসে শব্দনো তলহাৎ দেনা ইল। এসারে শব্দ হুদ্দা ইমার ঠারে আসে মৈতৈ ঠারে নেই। যেহার কাজে আমি মাতে পাররাং তাঙি মৈতৈ না। আমার সমাজে প্রচলিত ঐতিহ্যবাহী খেলা আহান ‘নিকন’। অবসর সময়ে খেলা এহান আমার মানুরাঙ জনপ্রিয়। বার্মার মানুয়েও খেলা এহান খেলতারা। তবে তাঙর উপলক্ষ্য খানি আলাদা ইসে। খরার সময় বরন ডাহানির কাজে নিকন (আক্কাবাত ঠারে - লিকুন) খেলা এহান খেলতারা। ইন্ডিয়া বাংলাদেশে বিষ্ণুপ্রিয়া যেতা আসি আমার প্রধান পেশা “কৃষি কাজ”। কিন্তু বার্মাৎ আমার মানু হুনারি(স্বর্ণকার) জাতহান বুলিয়া বেশি পরিচিত। তাঙি কৃষি কাজর লগে তেমন পরিচিত না। কালর হদগদে আমার পূর্বপুরুষ এতা ইন্ডিয়াত্ত লাম বেলিয়া নানান জাগাৎ ঘরপাতিসি। উত্তরসুরী হিসাবে আমিই এরে ইতিহাসর ডাঙর স্বাক্ষী। মিয়ানমারেও যে আমার মানু আসি বারো এত প্রতিকুলতার পিসেদে এপাগাও পূর্বপুরুষর ঐতিহ্য খুত আগো ধরিয়া থসি এহানউ আমার অন্যরকম প্রাপ্তি আহান। ইমার ঠার এহান বাপক মানকনকিয়ে তাঙর সৌরে না বাঙাদেসি লুকরিয়া থনা চাসিলা। হয়তবা ঔ সময়ৎ ইমার ঠারে অতারলে বিপদর আশংকা আসিল। উত্তরসূরি বাচিতে হয়তো বিষ্ণুপ্রিয়া মণিপুরি ঠার, সংস্কৃতি হাবি শূন্যের কোটায়। তারপরেও অন্ততঃ নিজর জাতিসত্ত্বা টিকিয়া থইতে কিঞ্চিৎ ঠার, কৃষ্টি কালচার ধরিয়া থসি এহানউ কম কিসারে। অন্ততঃ বিষ্ণুপ্রিয়া কুরাঙ কুরাঙ আসি প্রশ্নে মিয়ানমারর নাঙহানৌ স্বগর্বে উচ্চারণ করানি পারতাঙাই। বর্তমানর কুনো ইতিহাসে তাঙর নাঙহান থনা নুয়ারলেও বিষ্ণুপ্রিয়া মণিপুরির ইতিহাসে ডাঙর কুনো পাতা আহান ভরাট থাইতই তাঙর কথানো। তাঙর উত্তরসূরি স্থান, কালর হদগদে বাহিয়া জিতাইগা, ধর্ম আচারে সিতইলেউ কুনোনা কুনো কারণে তাঙর রকতে বিষ্ণুপ্রিয়া মণিপুরির পরিচয় এহান থাইতই সইনেই। 

 তথ্যর লিম: ১। ১৯ জুলাই ১৯৭১: ভারতে আশ্রয় নেওয়া শরণার্থী সংখ্যা ৭০ লাখ ছাড়িয়েছে - The Daily Star (১৯ জুলাই, ২০২১) 

২। Soe, Naing; ‘Akkabat people in Myanmar’, Page: 109, Chapter: 10, “Manipuri (Meitei Kathe) Settlements in Myanmar”; Editor - Naing Soe Translate - Nyan Moe Htat & M. Burhagohain 

৩। ঐতিহাসিক ‘চহি তারেৎ খুনতাকপা’ দিবস পালিত – প্রকাশ- www.bohumatrik.com (১০ জানুয়ারি, ২০১৬) 

৪। Soe, Naing; ‘Akkabat people in Myanmar’, Page: 110, Chapter: 10, “Manipuri (Meitei Kathe) Settlements in Myanmar”; Editor - Naing Soe Translate - Nyan Moe Htat & M. Burhagohain 

৫। Thant, Sithu; ‘Tracing the footsteps of Akkabat’, Page: 61, Chapter: 6, “Manipuri (Meitei Kathe) Settlements in Myanmar”; Editor - Naing Soe Translate - Nyan Moe Htat & M. Burhagohain 

৬। Soe, Naing; ‘Akkabat people in Myanmar’, Page: 110, Chapter: 10, “Manipuri (Meitei Kathe) Settlements in Myanmar” 

৭। Soe, Naing; ‘Akkabat people in Myanmar’, Page: 112, Chapter: 10, “Manipuri (Meitei Kathe) Settlements in Myanmar”; 

৮। Thant, Sithu; ‘Tracing the footsteps of Akkabat’, Page: 62, Chapter: 6, “Manipuri (Meitei Kathe) Settlements in Myanmar”; 

৯। Thant, Sithu; ‘Tracing the footsteps of Akkabat’, Page: 61, Chapter: 6, “Manipuri (Meitei Kathe) Settlements in Myanmar”; 

১০। Soe, Naing; ‘Akkabat people in Myanmar’, Page: 112, Chapter: 10, “Manipuri (Meitei Kathe) Settlements in Myanmar” 

১১। Soe, Naing; ‘Akkabat people in Myanmar’, Page: 117, Chapter: 10, “Manipuri (Meitei Kathe) Settlements in Myanmar” 

১২। Thant, Sithu; ‘Tracing the footsteps of Akkabat’, Page: 64, Chapter: 6, “Manipuri (Meitei Kathe) Settlements in Myanmar”; 

১৩। ইন্দোবাংলা বিষ্ণুপ্রিয়া মণিপুরি এসোসিয়েশন, লাইভ প্রোগ্রাম, সঞ্চালক – সন্তোষ কুমার সিংহ(কলকাতা), অনুবাদ সহযোগী – চন্দ্র কুমার শর্মা (মায়ানমার) - ২৭ জুন, ২০২১ 

১৪। Thant, Sithu; ‘Tracing the footsteps of Akkabat’, Page: 65, Chapter: 6, “Manipuri (Meitei Kathe) Settlements in Myanmar”;

লেখক,

সুরজিত সিংহ শিশির

সম্পাদক, নিংশিং চে

Share :

Tweet

✚

আরও কিছু পোষ্টঃ