বিষ্ণুপ্রিয়া মণিপুরি ঠারর লৌকিক এলার লুপা দিক আহান মাদৈ-সরারেলর এলা। মূলত বৈশাখ-জ্যৈষ্ঠ মাহাত ডিগল খরার সমেয়ত রাতি নুঙেই-নঙতলে ইমা-ইন্দোলে লপুকে সরারেল গিরকরাঙ বরণ মাগতেগা মাদৈ-সরারেলর এলা দিলা। এবাকাও কুন-কুন লয়াত বরণ-ডাহানির এলা পাল করতারা। দেবরাজ ইন্দ্র বরণর দৌগ, বৈদিক যুগর প্রধান দৌগ ইন্দ্র, ঋকবেদে হাবিত্ত য়াম শোলক/এলা আসেতা ইন্দ্রর নাঙে। বৈদিক যুগ লয়নির মাপাদেত্ত ইন্দ্র গিরকরাঙত বিষ্ণুর গুরত্ব বপনি অকরেসিল, তাপক-তাপক টেইপাঙ মানুয়ে বিষ্ণুরে ভগবান বুলিয়া নিঙকরানি অকরেসিতা। থাইনাকার দিনে(প্রাচীন কালে) মণিপুরিয়ে ইন্দ্র উপাসনা করেসিলা উতার উদাহরণহান বরণ মাগানির অনুষ্ঠানে পালকরতারা মাদৈ-সরারেলর এলা।
অজা ড. কালীপ্রসাদ সিংহ গিরকে মাদৈ-সরারেল সংস্কৃতি এহান খ্রিষ্টীয় সপ্তদশ শতাব্দী লয়ইতেগা বা অষ্টাদশ শতাব্দীর পইলাদে রচিত অসে বুলিয়া মাতেসে। অজায় খম করেসে এলা ‘মাদই-সরারেল’র এলা হান তলে দিলু।
“—মাদই গিদেই সালইলী,
বক্চা বাধিয়া সালকইলা
কতিয়ো দূরেই আইলীতা
টেঙ্গারা সিঞ্চাঙ লালইলী,
যাবারো মাটিয়ো না দেখলে
কতিয়ো দূরেই আইলীতা
পাম্পল টিংদিয়া কাদিরী,
ইমা বুলিয়া ডাহিরী
কতিয়ো দূরেই আইলীতা।
হুনরতা রাজা হুনরতা।
বাবরো ঘরগো পুরেরকো,
যেইঙগা হে রাজা যেইঙগা,
—নাযেইগা মাদই নাযেইগা'
তোর বাবারো ঘরগো না পুরের,
যেইঙগা হে রাজা যেইঙগা হুনারো
কেইরাক লামা দিয়া দে
বাবরো ঘরগো পুরেরকো —
‘—নাযেইগা মাদই নাযেইগা ‘
তোর বাবরো ঘরে না যেইগা’—
তোর বাবারো ঘরে গেলেগা
হুয়র পহু খেইতেইগা
মদরো সরাপ খেইতেইগা’
হুনারো কেইরাক লামাদে,
যেইঙগাহে রাজা যেঙগা হে
কারিফাবা থয়া যাগা হুনার কেইরাক লামা দিলু
‘—‘তোর বাবারো ঘরে গেলগা
দিঘালি পিরাত না বইছগা
মদরো সরাপ না পিছগা,
হুয়র পহু নাহেইছগা
মাদই গিদেই কেইরাক লামরীয়ে
ডাকৌ কুরুঙ বারেইতারা,
বেলাউ কেক্রক বাজেইতারা
মাদই গিদেই কেইরাক লামরীয়ে
নিঙলো জেঠী আহিলি ডিগালী পিরা নিকালেই
‘নাবইতৌ বাবা নাবইতৌ বাবা নাবইতৌ—
রাজারো মানা পেইলুকো নাবইতৌ বাবা নাবইতৌ’
নিঙলো জেঠী আহিলি,
মদরো সরাপ নিকালেই,
হুয়র পহু রাধে দেই।
হুয়র পহু নাহেইতৌ,
মদরো সরাপ না পিতৌ
ডিগালী পিরউ না বইতৌ।
না দেখতই ইমা না দেখতই,
তম্বুল হাতগ টাংতৌরে
মহরি হাতহান খালকরো,
হমাগা মাদই পিগা
লমইলু বাবা লমইলু—
রাজরো কেইরাক তুললকো লমইলু বাবা লমইলু—
না কাদি কারিফাবা লেইপাকথীপা কারিফাবা
মাদই গিদেই থামনা লালাইরিয়ে"
ফুলতলীর স্বর্গীয়া মধুমতী ক্ষত্রানী গিথানকে এলা এহানর আরাক পাড়েং দুহান মাতেসিলি, — অও পাড়েং দ্বিয় হানও দিলুঃ
“দম্বা গিদেইঅ দামিনী গিদেইঅ,
লেইসুপুঙে শাতৈরী গিদেইঅ
ইমারঅ মেঙসেল দেহুরি —
বাবারঅ মেঙসেল দেহুরি
— আহালে নিঙলআহিলী-ডিগালি পিরা নিকালেই—”
অজা ড. কালীপ্রসাদ সিংহ গিরকর মতে এলা এহানর ঠার হান বরণর মূল এলা হানাত্ত(“সারারেলতে রাজারো লেইপাক কুমৌ কয়লো…” ) আধুনিক অসে, বারো বাংলা, অসমীয়া ঠারর প্রভাব য়াম অয়া আসে। অজায় এলা এহানর প্রেক্ষাপট হান মাতেসে, কিন্তু গদ্যত ভাষান্তর নাকরেসে। নাঙহানসহ এলা হানর ৱাহির অর্থ বারো ব্যুৎপত্তি বিশ্লেষণ করানি লাগের।
মাদৈ-সরারেল এলার ৱাহি-শব্দর ব্যুৎপত্তি বিশ্লেষণ:-
১) সরারেল: সুর=দৌ/দৱ অর্থাৎ দেবতা, রেল =শ্রেষ্ঠ/ পতি/ রাজা। সুর + রেল = সুররেল > সরারেল/সরালেল (মৈতৈ: সরারেন প্রাকৃত ৱাহিগ; মানে দেবরাজ/দেবপতি/দেবশ্রেষ্ঠ অর্থাৎ ইন্দ্র। ('রেল' বিঃ মণিপুরি ৱাহিগ, এবাকাও ক্ষেত্র বিশেষ ব্যবহার করিয়ার। যেমন 'অজারেল'=ডাঙর/নাঙপালপা অজা, ‘মেইপারেল’=ডাঙর/নাঙপাল্পা/শ্রেষ্ঠ মেইপা) । ‘সরালরাজা’ ৱাহি এগও আমি দেবরাজ ইন্দ্রর প্রতিশব্দগ হিসাবে মাতিয়ার।
২) সরাল : ৱাহি এগ আহেসেতা সংস্কৃত ‘সুরালয়’ ৱাহিত্ত। ‘সুরালয়’ (সুর+আলয়) মানে দেবতাদের আলয় বা স্বর্গ। ‘সুরালয়’ ৱাহি এগ ইমার ঠারে হুরকা করে মাতানি অকরের ‘সরাল’ (হিন্দিতও আলয়(গৃহ) হুরকা ইয়া ‘আল’ উচ্চারিত অনার উদাহরণ আসে, যেমন- 'শশুর+আলয়'= শশুরালয় » শশুরাল)।
৩) মাদৈ: ৱাহি এগ সংস্কৃত 'মহাদেবী'র অপভ্রংশগ(ড: কে.পি. সিংহ)। ব্যুৎপত্তি বিশ্লেষণ এহানাত আমি লেপনি পারিয়ার যে ‘সরারেল’, ‘সরাল’ বারো ‘মাদৈ’ ৱাহি তিনগও প্রাকৃত শব্দ, সংস্কৃত ৱাহির অপভ্রংশ বা বিকৃত উচ্চারণ।
৪) সালইলি: সাল+অইলি (সংস্কৃত ‘সজ্জা)’ » প্রাকৃত ‘সাজ্জ’ » ‘সাজন’ » বিঃমঃ ‘সাল(অনি)’ মানে হাজানি, "রওনা অনা" অর্থেও ব্যবহার অর।
৫) বকচা: ফুতিলো বাদতারা ভার - পজার মচা। মারাঠী ‘বোকচা’, আরবি ‘বকচা’, বাংলা ‘বোচকা’; মূল শব্দগ সম্ভবত ‘বাহ্ক’
৬) টেঙারা: পর্বত, সংস্কৃত ‘টঙ্ক’ = উচ্চভূমি।
৭) সিঞ্চাঙ: পর্বতশৃঙ্গ, সংস্কৃত শৃঙ্গীকা।
৮) যাবারো(জাবারো) মাটিয়ো:তিঙা মাটি জাবুরিয়া পানির তলে থার মাটি, জাবুরা মাটি। যা(জা) বারো= জাবুরা (হিন্দি- চুভা(ধাতু), বাংলা-জুবড়া/ জোবড়া = তিঙানি)। মাটিয়ো= সংস্কৃত ‘মৃত্তিকা’, পালি ‘মত্তিকা’, প্রাকৃত ‘মট্টিআ’, বিঃমঃ মাটিঅ/মাটিয়ো, বাংলা ‘মাটি’, হিন্দি ‘মট্টি’/‘মিট্টি’, মারাঠী ‘মাতী’, পাঞ্জাবী ‘মাট্টী’, গুজরাটী ‘মাটী’ উড়িয়া ‘মাটী’, সিন্ধ্রি ‘মিটী’, মৈথিলী ‘মাংটী’।
৯) পাম্পল: বাহু, ভুজ, (মৈতৈ পাম্বম(ন);) কহনিগর গজেত্ত লেম্পাল হানর পেয়া আতর অংশ
১০) টিংদিয়া: সাল করিয়া(মূল ধাতুগ সংস্কৃত ‘তন্’) হিন্দি/বাংলা-‘টান’, মারাঠা/সিন্ধ্রি-‘টাণ’, মৈথিলি ‘ঠান/তান’।
১১) কেইরাক (Ladder): মই, (মৈতৈ-কেইরাক)। কাই(house)+ লাক-পা (=to ascend) (Dr. K.P. Sinha) কাইলাক/কেইরাক। (তবে মর মতে “কাই্+লাক= কাইলাক » কাইরাক » কেইরাক। কাহ্= climb, আরোহণ; ‘লাক(পানি)’ » to touch/to catch; মূল ধাতুগ সংস্কৃত ‘(স)লগ্ন’, প্রাকৃত ‘লগ্গ’ বাংলা/ গুজরাটি/ মৈথিলী/ উড়িয়া/ অসমীয়া- ‘লাগ’, হিন্দি/সিন্ধি- লগ, বিঃমণিপুরি - ‘লাক’ = to touch.
১২) পহু: পশু, সংস্কৃত ‘পশ্’ ধাতু।
১৩) সরাপ: মদ/সুরা; আরবি ‘শরাব’।
১৪) করিফাবা: সম্ভবত পুতকর নাঙ্ হান (কারিফাবা নাঙে মণিপুরর মধ্যযুগর রাজা আগ আসিল)।
১৫) কুরুঙ: বাদ্যযন্ত্র বিশেষ।
১৬) বেলাউ: বেনা/পেনা।
১৭) কেক্রুক: পিপিনি জাতীয় বাজানির যন্ত্র।
১৮) দিঘালী(ডিগালি) পিরাত বহানি: পাড়েঙ আহানাত বয়া খানা মানে পঙক্তি ভোজন।
১৯) মানা: আপত্তি; অসমীয়া, হিন্দি, মারাঠী, গুজরাটি, উড়িয়া- ‘মনা’; সংস্কৃত- ‘মা’= নিষেধ।
২০) গিদেই: ইচে, হয়ো, দিদি (‘গিদেই’ রাজারগাং ৱাহিগ) গিথানি, গিথানক, গিদেই এতা বিষ্ণুপ্রিয়া মণিপুরি ৱাহি।
২১) নিঙল: কন্যা, মৈতৈ-নিঙন।
২২) রাধে(রাদে) দেই: হিজা দেই; সংস্কৃত ‘রন্ধন’।
২৩) তাম্বুল: চন্দোয়া; বাংলা ‘তাঁবু’, হিন্দি ‘তম্বু’, মারাঠী ‘তংবু’।
২৪) মহরী: বাংলা মশারী মশহরী; সংস্কৃত ‘মশক’, প্রাকৃত ‘মসঅ’, বি:ম: ‘মহা’।
২৫) খাল(করানি): আচ্ছাদন(গজ হান) মৈতৈ ‘খান-পা’, সংস্কৃত- ‘ছাদন’।
২৬) লমইলু(লম+অইলু): লয়ইলু(লয়+অইলু), (লমইলু, লয়ইলু ৱাহি দ্বয়গ মূলত আকপেইত্তই উজ্জেসেতা, সংস্কৃত ‘লয়’= বিনাশ, তিরোভাব, অন্তর্দ্ধান, অন্ত। (প্র)লয়=ধ্বংস।
২৭) লেইপাকথীপা: কপালথীপা, Unlucky man. দূর্ভাগা(পুরুষ)। মৈতৈ লাই(god) + পাক-পা= (to stick, নাপয়া থানা) + থী(bad, শাক্তি) + পা(পুং বাচক প্রত্যয়); সংস্কৃত ‘রায়’= বিষ্ণু দেবতা।
২৮) থামনা: দূরত্ব, distance।
২৯) লালইরি(লাল+অইরি): অতিক্রম করিরি (স্ত্রীবাচক), লাল = অতিক্রম।
মধুমতী ক্ষত্রানী গিথানরংত পাসু পাড়েঙ্ উহানির ৱাহির অর্থ:-
৩০) দম্বা: নিঙল আগর নাঙ্ হান।
৩১) দামিনী: নিঙল আগর নাঙ্ হান।
৩২) গিদেইঅ: অ গিদেই।
৩৩) লেইসুপুঙ: (লেইসৌ+পুঙ্), লেইসৌ= উঁইপোকা(termite), লেই= মাটি, সৌ(অনি)= (মাটির)কলপুক নিকুলানি, ফেনা; পুঙ্= ডিবি, দল। মাটি হান সৌ’করিয়া দল/ডিবিগ করতারা বুলিয়া ‘লেইসৌ’ মাততারাতা। লেই= মাটি, সৌ= শিশু, মাটির তলে জম হংকরিয়া থাইতারা আরো লেইসৌ মাততেও পারে।
৩৪) শাতৈরী: শাতনি= প্রস্ফুটিত অনা, শাতৈরী= প্রস্ফুটিত অইরি(স্ত্রীলিঙ্গ)।
৩৫) মেংসেল: দর্পন, Looking glass।
৩৬) আহাল: এপেইত পিতৃগৃহ/বেয়াপির ঘর, মৈতৈ- আহান/ বি:ম: আহাল= অবিভাবক।
মাদৈ-সরারেলর মূল ওয়ারি হান এসাদে,
“কিতাপারা দিন আহান সরারেল গিরক আট্টিঙ্গাদে বুলাত নিকুলেসে উবাকা লিকলির দৌগ পারা হবাসে অলকগ লকেইর নিঙলসৌ আগো তার আহিত পরিল। টেইপাঙমানু নিঙল এগর রাশি-কশি অসে হবা এহান দেহিয়া জারে নুয়েইল, লপুকগত খেতির কাম করিরি নিঙলশৌ এগ ফরদোৱেয়া নিলগা(দাপদোয়েইলো)। লুহঙ করিয়া পাটরাণীগর পদফামে বহেইল। তেই মাদৈ নাঙে পালয়া স্বর্গৎ সরাল রাজার কন্নুঙে থাইলি। সরারেলর বরে তেইর বেয়াপা নুয়ারা-পানি ককয়া হবা-বালা অয়া নুঙেই থাইলা।
সরারেলর বরে নঙসাঙ অইল মরণ-জরণ নেই মাদৈগিদেইর বেয়াপার গাঙর কুকুর আগো মরে পরিলগা। নংসাং অইল সরারেলর বরে গাঙ্ উহানাত মরণ-জরণ নেইগ; উহানে টেইপাঙ মানুগর ঠৌনা ডাক-সেলপুঙ বারেয়া কুকুর এগরে দাহ করাত শশ্মানে নিলাগা।
স্বর্গত থায়া কুকুরগ দাহর জ্বিগ দেহিয়া মাদৈগিদেয়ে নিঙকরলতাই তেইর বেয়াপার গাঙে ঘরজ্বি লাগেসে। বেয়াপার ঘর-জিনা খুটৌ-নাটৌ অইল সাদ বুলিয়া আহালে (বেয়াপার ঘরে) যানা মনেয়া সরাল রাজারাঙ গেঙটানি অকরলো।
গেঙটানি আকয়া সরাল রাজায় তেইরে শর্ত সাপেক্ষে পুতক কারিফাবারে(পুতকরে) রাজ কন্নুংগৎ থয়া বেয়াপার গরে যানার য়াথাঙ্ দিলো। বেয়াপার গরে গিয়া মদ, হুয়রর মাহু (মাঙস)নাখানিরকা মাতলো, বারো হাবির লগে পাড়েঙে বয়া নাখানিরকাও মাতলো। এসাদে শর্ত দিয়া স্বর্গর কন্নুংগত্ত বেয়াপার গরে যানারকা হুনার কেইরাক হান পারে দিলো। ডাক-সেলপুঙ বারেয়া মাদৈ গিদেই বেয়াপার গরে সালইলি।
তেইরে খৱানিরকা বাপকে হুয়রর মাহু কিতা রাদানির য়াথাঙ দিলো। সরাল রাজায় মানা(আপত্তি) করেসে হানতে খানা না করলো। তেই খেইতে সরাল রাজায় স্বর্গত্ত না দেখবতা বুলিয়া তাম্বুল হাতগো(সাতগো) খাল করলা, উতার তলে তলে বারো মহরি হান টাঙলা।মহরির ভিতরে বৱোয়া খোয়ানির সিজিল করলা। বারে বারে খানার কা মাতানি অকরলা, গেংটানি আকয়া জাড়ে নারিয়া খানাত বহিলি।
কিন্তু তেই খানার কাজে মহরি তুলিয়া ভিতরে হমানিরকা করতেই সরাল রাজায় স্বর্গত থায়া হারপেইল, হাজেয়া তেইরে দেসি ভাতচাংলোকে থুঃ করে সেপ আকচানি বেলাইল। বারো স্বর্গৎ আঞ্চিল অয়া কানার হুনার কেইরাক হান তুলিয়া কন্নুঙগর থঙচিল (দুয়ার) হান গাটলো।
মাদৈগিদেই স্বর্গত যানা নুয়েইল। এগদে কন্নুংগৎ পুতক কারিফাবা মালকরে বিসারেয়া কাদের। উবাকা সৌএগরে ঠেম করিয়া মাততারাতা “নাকাদি কারিফাবা–নাকাদি; মাদৈ গিদেই থামনা লালৈরি।” (থামনা লালানি = দূরেইর ফাম লালনি মানে অতিক্রম করানি।)
মাদৈ-সরারেল ৱারি হানর তুল মান্না মৈতৈ লোক কাহিনী আহানও আসে। ৱারি উহান অমাটিক তঙাল নাসে।
"---স্বর্গাধিপতি সরারেন (সরারেল ‘র’ মৈতৈ উচ্চারণ হান) গিরক বরণর দৌগ, তার মূল অস্ত্র বজ্র হান, দলা আত্তিগ তার বাহনগ। হুইমু লেইমা নাঙে কোন্থৌজাম লকেইর(Konthoujam Sagei)র বেয়াপা আগো আসিলি, উগরতা রাশি-কশি হবা নিঙলসৌ আগো আসিলি । কিতা পারা দিন আহান নিঙল শৌ এগ লপুকে ধানর খেতিৎ কাম করিরি উবাকা সরারেন গিরকে দেহিয়া ঠিকপাবেলল। আট্টিঙ্গাত থায়া সরারেল গিরকে নিঙলশৌ এগরে মাতলতা, “হে কোন্থৌজামর নিঙলশৌগ আজিত্ত পুরি পাঁচদিন পালপাৎ মি দলা আত্তিগত চড়িয়া তুমারাঙ আহিতৌ, উদিন তরে লুহঙ করিয়া নিতৌগা”। দৈববাণী এহান হুনিয়া হুইমু লেইমার ঝিলক উঙয়া ঘরে আইলি। উদিনত ব্রহ্মচর্য পালন করানি অকরলো। পাঁচ দিন পালপাৎ সরারেল ধলা আত্তিগলো আয়া তেইরে লুহঙ করিয়া স্বর্গর পাটরাণীগ করলগা। বারো অমর অনার বর দিল। হারৌ অয়া সরারেল গিরকে তেইর বেয়াপারেও অমর অনার বর দিল। কিতাপারা দিন আহান হরপে কামাড়েয়া তেইর বেয়াপার শিকারী কুকুর আগো মরিল। ডাক-সেলপুঙ বারেয়া কুকুর এগর শরাত করলা। স্বর্গত থায়া বেয়াপার ঘরে শারাদ্ধ করতারা এহান হুনিয়া সরারেল গিরকরে মাতিরি, ‘তিতে মর বেয়াপারে অমর অনার বর দিলেগ না, কুঙ্গ দৌ অয়া মর বেয়াপার ঘরে শরাত করতারাতা? কুকুর আগো মরিয়া শরাত-কর্ম করতারা উহান সরারেন গিরকে বাগেইল। অয়াও তেই শারাদ্ধত য়ৌঅনি মনেইল। সরারেল গিরকে আহালে(বেয়াপার ঘরে) যানার য়াথাঙ দিলো, কিন্তু টেইপাঙ মানুর ঘরে নাখানিরকা মাতলো।
নংসাং দিন বাদে ঘরে আইলি নিঙলগরে মালকে ভাত আকচারা খোয়ানির সিজিল করল। সরারেলে ভাত খেইতে না দেকবতা বুলিয়া গজেদে ফুতি টাঙিয়া খানারতা হাজা দিল। ভাত চাঙলোকে খানাত বহিতেই সরারেলে হার পেইলো। স্বর্গত থায়া গজেত্ত পুরি ভাত চাঙলোকে থু বুলিয়া সেপ চারি বেলা দিলো। সরারেল গিরক নুঙেই নাপেইল, এহান হারপেয়া নাখেইল। স্বর্গত সালইলি, সরারেনে তেইরে না লক্করলো(গ্রহন না করলো)। তেইর বেয়াপারে বারো তেইরে যেতা যেতা বর দিয়াসিল উতা আল্থক করলো।
বৌরাজা(পবনদেব) গিরকে মাদৈ গিথানক নাখেয়া ভাত চাঙলোকেত্ত উঠলি উহান দেহেসেগ। বিষয় এহান সরারেন গিরকরে বাগেইলগা। তাও সেঙকরে নিঙলশৌ এগরে য়াকরিয়া ঘরে কা’করল। তেইরে বারো তেইর বেয়াপারে সেঙকরে অমর অনার বর দিলো।"
মৈতৈ লোকগল্প এহান বারো বি: মণিপুরি মাদৈ-সরারেলর ৱারি হান চপক মান্না । মাদৈ-সরারেলে ঐরাবত আত্তিগর ৱারি-পরি নেই বারো মাদৈর মালকর নাঙ হানও নেই। মৈতৈ লোক কাহিনী এহান লয়ইতেগা সরারেলে মাদৈ গিদেইরে য়াকরিয়া গ্রহন করেসে, কিন্তু বি: মণিপুরি মাদৈ-সরারেলর ৱারিত কথা চুটি এগ না’পাসু।
ঋকবেদর প্রধান দৌগ ইন্দ্র, বিভিন্ন পৌরাণিক ৱারিতও তারে স্বর্গাধিপতি দেব রাজ অর্থাৎ সুরপতি বুলিয়া মাতেসি। বিভিন্ন পৌরাণিক কাহিনীত দেবরাজ ইন্দ্রর বাহনগর নাঙ ঐরাবত বুলিয়া মাতেসি। তার বাহনগ ধলা আত্তিগ। তবে ঋকবেদর ইন্দ্ররতা ঐরাবতগ(ধলা আত্তিগ)নেই। ঋকবেদে বারো বিভিন্ন পুরাণে ইন্দ্রদেবরে বরণর দৌগ বুলিয়া বর্ণনা করেসি, বারো বজ্র হান তার খুচ্চু(আতিয়ার) হান বুলেসি। ঋকবেদ বারো পৌরাণিক কাহিনীর দেবরাজ ইন্দ্রই কুন মরণশীল টেইপাঙ মানু নিঙল লুহঙ নাকরেসে। কিন্তু বি: মণিপুরি বারো মৈতৈ লোক কাহিনীর সরারেলে মণিপুরর টেইপাঙ মানু নিঙলগ লুহঙ করেসে। এসাদে তথ্যে নিঙে অর হিন্দু মাইথোলোজির ইন্দ্র বারো সরারেল আকগো অইলেও মাদৈ-সরারেলর ৱারি এহান মণিপুরে সৃষ্টি অসে মণিপুরি পৌরাণিক ৱারি হান ।
গ্রীক পৌরাণিক কাহিনীর জীউস (Zeus) পাঙকালপা দৌআগো। জীউসর ৱারির তুল মণিপুরর সরারেলর ৱারি খানি মান্না, যেমন জীউস মেঘর দৌগ, তার মুল অস্ত্র হান বজ্র হান। তাও সরারেলর ঠৌনা টেইপাঙ মানুর নিঙল আগো লুহঙ করিয়া উগরে অমরত্ব বর দিয়াসিল। এরে কাফামে মণিপুরর সরারেল বারো গ্রীক জীউসর ৱারি খানি মান্না অসে।
ভারতীয় ইন্দ্রদেব বৈদিক যুগর দৌগ, গ্রীক জীউস( Zeus)র ৱারি উহানও প্রায় সম-সাময়িক। আগেও মাতেসু বৈদিক যুগর পয়লাদে ইন্দ্রদেবই সর্বশ্রেষ্ঠ দৌগ পালসিল। পরেদে ভগবান বিষ্ণু প্রধান দৌগ লেপসে বুলিয়া য়ামপারাগই মাতিয়া য়াসিগা। বৈদিক ইন্দ্র বারো গ্রীক জীউসর লগে মণিপুরর সরারেলর ৱারি পরির মান্নাপা এহানে নিঙে অর বৈদিক যুগ লয়নির মাপাদে বা বৈদিক যুগেই মণিপুরে আর্য সংস্কৃতি সম্পন্ন টেইপাঙ মানু মণিপুরে বা মণিপুরর কাদা-বারাদে লাম ল থাইবাগা। উহানে মণিপুর এহান প্রাচীন আর্যর লাম হান বুলিয়া য়ামপারাগই মাতেসিতা।
তথ্যর লিম:-
১) Bishnupriya Manipuri Bhashtavatar Ruparekha - Dr. K.P. Sinha.
২) The Bishnupriya Manipuri’s their language, literature and their culture - Dr. K.P.Sinha.
৩) উৎসবর উৎস. - সমর চক্রবর্তী।
৪) A History Of Manipuri Literature. – By R.K. Jhalajit Singha.
৫) The History Of Manipur, An early period. – By W. Ibohal Singh.
৬) স্বর্গীয়া সেনানু দেবী(বিদ্যানগর, কৈলাসহর) শ্রীমতী শেফালী সিংহ (বিদ্যানগর, কৈলাসহর) বারো স্বর্গীয়া মধুমতী ক্ষত্রানী(ফুলতলী, আওর, কৈলাসহর)।
৭) https://bishnupriyamanipuripratapsinha.blogspot.com
0 Comment "মাদৈ - সরারেলর ৱারি - প্রতাপ সিংহ (নিংশিং চে - ২০২৩)"
একটি মন্তব্য পোস্ট করুন