গন্ধর্বর রাজত্বকালে অর্জুন মণিপুর রাজ্যে পরিভ্রমণে গিয়া গন্ধর্ব রাজকন্যা
চিত্রাঙ্গদার রূপে মুগ্ধ ইয়া বিবাহ বন্ধনে আবদ্ধ ইসিল। অর্জুন ও চিত্রাঙ্গদার আকগো পিতক বভ্রূবাহন মণিপুরর সিংহাসনে
অধিপতিগো ইসিল। মণিপুরে গন্ধর্বর পরে আর্য-ক্ষত্রিয়র শাসন শুরু ইল। কুরুক্ষেত্রর যুদ্ধর পরে যুধিষ্ঠির অশ্বমেধ যজ্ঞ
করলে রাজা বভ্রূবাহন অরে যজ্ঞে যোগদান ইতে মিথিলার রাজধানী হস্তিনায় আহিসিল। যজ্ঞহান লমিয়া মণিপুরে ফিরানির সময়
বভ্রূবাহন হস্তিনার বিষ্ণুপ্রিয়া মন্দিরস্থ অনন্তশায়ী ডাঙর বিষ্ণুমূর্তি আগোনো ফিরিয়া আহিল। বিষ্ণুবিগ্রহ স্থাপনর
পরেত্ত মণিপুরর রাজধানী “বিষ্ণুপুর” নাঙ এহান পালসিল। অর্জুনর বংশধর ক্ষত্রিয় বংশী বারো
বিষ্ণুর উপাসক অনার কারনে তাঙরে বিষ্ণুপ্রিয়া মাতানি অর বারো মণিপুরর অধিবাসী অনার কারনে বিষ্ণুপ্রিয়া মণিপুরী
মাততারা।১ বিষয় অহন পরিস্কার যে, প্রাচীনকালেত্তো মণিপুরে বৈষ্ণব ধর্মর প্রচলন আছিল।২
খ্রিষ্টীয় প্রথম শতাব্দীত মণিপুর রাজা পাখংবার আমলে প্রচলিত পয়সাকড়িত সংস্কৃত অক্ষরে লেখা প্রমাণ করের মণিপুরর সনাতন
ধর্মর প্রাচীন অস্তিত্ব।৩ শান্তদাস বাবাজির মণিপুরে ফৌঅনির আগেই বিষ্ণুপ্রিয়া বিষ্ণু-উপাসক আসিলা। মৈতৈ শাসন
বারো পারস্পারিক মিথস্ক্রিয়ার কারণে মৈতৈর নাগ রাজ্যর নাগ আরাধনা (সেনামাহিজম)এহান খানি হাচুরাসিল।
আদিত্ত বিষ্ণু উপাসনার কাজে তাঙরতা সংকীর্তন আসিল, গীতগোবিন্দর এলা এতা তাঙর মুখ্য কীৰ্তন
ইসিল। ৪
দ্বীননাথ অজার লেঙকরা “মণিপুরের প্রাচীন ইতিহাস” লেরিকে বভ্রূবাহনর বংশাবলীর বিস্তারিত
বর্ণনা পানা অকরের। পয়লাকা চন্দ্রবংশতো আরাম্ভ ইসে, তারপরে অর্জুন, বারো তারপরে বভ্রূবাহনর নাঙহান আহেসে। বভ্রূবাহন
মণিপুরর একছত্র রাজচক্রবর্তীগো আছিল। তার রাজধানীহান আসিল বিষ্ণুপুর। অহত পাংখাংবার পরে আপকপা, ক্ষুমল গুরু, কুলদেবতা
মাতিসি আবার শিবর অবতার বুলিয়া মাতিসি ইসে। তলহাত বভ্রুবাহনর বংশাবলি তুলিয়া দেনা ইল,
আতিয়া গুরু >> পাখাংবা >> ক্ষুমল গুরু/ ক্ষুমল আপোকপা। মণিপুরী এতা এরে ক্ষুমল আপোকপার
অনুসারী বারো সাম্প্রতিক সময়ে মৈতৈ গোষ্ঠী আহানে আদি ধর্ম আপকপা নিঙকরতারা। কিন্তু এহেননো দেখরাঙ আমার পূর্বতন লেখকর
দ্বিমত আছে। আপোকপা আমার আদি পিতাগো সইনেই। আদি পুরুষর পূজা করানি অহন আমার সনাতন সংস্কৃতি। ৫ কিন্তু অহনরে
ধর্মআহার ভগবানগো হঙকরিয়া আলাদা ধর্ম প্রতিষ্ঠা করানির চেষ্টা অহন বৃটিশর ডিভাইড এন্ড রুল অর কুচক্রান্ত মাত্র।
৬
ড. রণজিত্ সিংহ অজায় মাতিসে, "মৈতৈর আদি দেবতা পাহাংবা, সেনামাহী বা আপোকপা বিষ্ণুপ্রিয়ার মাঝে
শ্রদ্ধার সাথে পূজনীয়। অপরদিকে আর্যীয় তথা বিষ্ণুপ্রিয়াদের হিন্দু দেবদেবীরা মৈতৈ সমাজে পূজিত"।
যেহান আমার আদি ধর্মহান কিহান বারো অরিজিন স্পষ্ট করের। ৭
বিষ্ণুপ্রিয়া মণিপুরীর অরিজিন : ইন্দো ইউরোপিয়ান অরিজিন।
মৈতৈ মণিপুরীর অরিজিন: তীব্বত-ব্রহ্ম ভাষা পরিবারর কুকি চীন অরিজিন। আমার প্রাচীন নির্দশন মাদৈয় সারের
এলা/ বরন ডাহানির এলা।
খাইর মতে তাঙর প্রাচীন নিদর্শন: পূয়া, যেতা খাইর থারনো কিছু কাল্পনিক লোকগাথা আপকপা, সেনামাহি নিয়া
লেখা। খাইয়ে আদি ধর্ম আপকপা মাততারা। আমার আদি ধর্ম সনাতন কারণ, ইন্দো ইউরোপিয়ান অরিজিন অহনই আর্য/সনাতনী অরিজিনহান।
যার কারণে বাংলা, হাজং, অসমীয়া বারো বিষ্ণুপ্রিয়া মণিপুরী ভাষা অতা সিস্টার লেঙ্গুয়েজ মানে ইন্দো ইয়োরোপিয়ার ভাষার
পরিবাররতা। বারো মৈতৈ, খুমি, বম, খেয়াং, পাংখো, লুসাই ম্রো এতা তিব্বতী-বর্মী ভাষার পরিবারতা ( সিস্টার ল্যাঙ্গুয়েজ)।
৮ অরিজিন দুহার আদি ধর্ম আকহান এহান নার?
মনিপুরে গৌড়ীয় বৈষ্ণব ধর্ম অহন প্রাচীন ধর্মহান। অহর প্রমাণ পানা অকরের পন্ডিত লবখেন্দ্র গিরকে লেঙকরেসে “খুমল
পুরান” লেরিকে। ‘খুমল পুরান’ মৈতেই ঠারে লেঙকরা প্রাগ ঐতিহাসিক লেরিক হান।
এহান যেহেতু মৈতৈ ঠারনো লেঙকরাহান যার কারনে মৈতৈর জাতিরকা রচিত পুরাণহান।
“রাধা-কৃষ্ণরে হমা দিউরি! হর-গৌরীর চরনেও হমাদিউরি !"
গিরকর এরে দুই লাইন মণিপুরের সনাতন ধর্মর প্রাচীন অস্তিত্বর প্রমাণ থর।
১৭১৪ সালে নাগরাজ্যর দুর্ধষ রাজা পামহৈবা মণিপুরর আদি রাজা(বিষ্ণুপ্রিয়া) ইংরাকরে পরাজিত করিয়া রাজ্য অধিকার করেসিল।
বিষ্ণুভক্ত বিষ্ণুপ্রিয়া মণিপুরী বৈষ্ণবরাজ্যে নিজর দেশেই পরাধীন জাতি ইয়া থাইলা। ধর্মীয় কামে বাধা প্রদান, নিজর ঠারে
অতারানি নাদানি অকরলা। বিষ্ণুপ্রিয়া নিজর জীবন রক্ষারকা পূর্বপুরুষর উদ্দেশ্যে(ক্ষুমল গুরুরে ক্ষুমল আপোকপা) আপোকপার
পূজা মাতিয়া চালানি অকরলা। বিষ্ণুপ্রিয়া এতার এ দুরবস্থাত্ত মুক্তি দেনারকা বারো বৈষ্ণব রাজ্য পুন: প্রতিষ্ঠারকা
ভগবানরাঙ প্রার্থনা করানি অকরলা। পিসেদে ১০ বছর পর অরে হবা ক্ষেন্তাম অহন আহিল। ১৭২৫ সালে শান্তদাশ বাবাজি মণিপুর
হমবুকে আহিসিল পরিব্রাজকগো হিসাবে, ত্যাগী বৈষ্ণব আগো হিসাবে। মণিপুর রাজ্যে হমানির পর মৈতৈর বেইবুনির তেম্পাকর বিদা
খাসে, মৈতৈর অতার অনাচার দেখিয়া বপিয়া দুঃখ পাসে। পিসে গরীব নেওয়াজ রাজায় খবর পেয়া রাজ দরবারে নিয়া গেলগা বারো
দীক্ষা নেনা চেইলে বাবাজিয়ে মাতিসিল সদাচারী নাইলে মি দিক্ষা নাদিম।
আরাকউ লেখা তামকরিক..........
বিষ্ণুপ্রিয়া মণিপুরী ভাষা আন্দোলন ও ২৩ মে নিয়ে কিছু কথা (পর্ব-১) লেখক: কাঞ্চনবরণ সিংহ
মৈতৈ এতা সদাচারী নানিরকা সনাতন রীতির দীক্ষা গ্রহনর রীতি (আমি যেহানরে লেমক লনা মাতরাঙ) অনুসারে মস্তক মুণ্ডন করিয়া
স্নান করিয়া শুদ্ধ বস্ত্র পরিধান করে দীক্ষা গ্রহন করলা। বিষ্ণুপ্রিয়া অতা আগেত্ত বিষ্ণুভক্ত সদাচারী, বৈষ্ণব
বাবাজিয়ে হারপানির পরে বিনা স্নানেই, মস্তক মুন্ডন নাকরিয়াই লোকশিক্ষারকা বিষ্ণু মন্ত্রে দীক্ষা প্রদান করলো। আমার
গুড়িগ বিশুদ্ধ আর্যবংশীয় আদি বৈষ্ণব অনায় পামহৈবার আমলে শান্তদাস গোঁসাই গিরকরাঙ বৈষ্ণব ধর্মে দীক্ষা লৈতেগা আমি
বিষ্ণুর উপাসক বুলিয়া প্রায়শ্চিত্ত করানি না লাগিছে, কিন্তু মৈতৈরতা মুড় খুড়িয়া দীক্ষা নেনা লাগেসিল। যেহারকা
খাইয়ে আমারে লুদাবা খুত বা স্নান বর্জিত জাতি বুলিয়া মাতলা। আমার মানুয়েও তাঙরে আমাংবা খুত বা অশুদ্ধ
জাতহান বুলিয়া মাতলা অহন আমার বিভিন্ন লেখকর লেঙকরা ইতিহাসে স্পষ্ট লেখা আছে। ৯, ১০, ১১, ১২,
১৩
যার কারনে মণিপুরী মৈতৈ বেইবুনির ভিতরে কততায় বৈষ্ণবধর্ম ছাড়াও আপোকপা/ সেনামাহি হমাইতারা। তবে আপোকপা ধর্মর অনুসারী
সংখ্যা অত্যন্ত কম মাতানি অকরের। বিষ্ণুপ্রিয়া মণিপুরী হাব্বিই গৌড়ীয় বৈষ্ণবধর্মর অনুসারী বারো হাব্বি হিন্দু
রীতিনীতি ও আচার অনুষ্ঠান শ্রদ্ধার সাথে পালন করতারা। খাইর আপোকপা অনুসারী আমারতা নেই মাতানি অকরের।
১৪
২৪ মার্চ, ১৮৯১ খ্রী: সেন্ধাহাত, ব্রিটিশ সৈন্যয় কোন রকম যুদ্ধর ঘোষণা নাদিয়াই কাপুরুষর অসারে মণিপুরর রাজা
টিকেন্দ্রজিতর ঘর প্যালেস কম্পাউন্ডগো আক্রমণ করেসিলা বারো অরে খেন্তাম অহন ভগবানর রাস লীলার অনুষ্ঠান আহান চলের
সময়হান। খাঙদা অসারে ধর্মীয় অনুষ্ঠানে আক্রমন করিয়া অনুষ্ঠান চানাত আহিসি লিশিঙ আহান ইমা-ইন্দল, বারো সৌরে নৃসংশভাবে
হত্যা করেছি। মণিপুরর সৈনিক বারো সাধারণ মানুয়ে অতর্কিত হামলার উত্তরে পাল্টা হামলা করলে ব্রিটিশ পিস আলইতে বাধ্য
ইসিলা। কিন্তু ধরা পরেসিলা ৫০০গোর মত ব্রিটিশ স্বশস্ত্র যোদ্ধা। এরে ইংরেজ এতারে মৃত্যুদণ্ড দেনা ইসিল। পিসেদে ব্রিটিশও
আলথকে প্রতিশোধ নেনারকা আরো সংগঠিত ইয়া তেননাম আক্রমন করিয়া মণিপুরর ৪০০গ মণিপুরী সৈন্য মারেসিলা, ইমাইন্দলরে লাঞ্চিত
করিছিলা। মন্দির, ঘরবাড়ি জ্বালাও পুড়াও করেসিলা। রাজা টিকেন্দ্রজিতরে অন্যায়ভাবে ফাঁসি দিয়াছিলা।
১৫
ভারতে ভাষা ও উপভাষা কেন্দ্রিক বিভাজন হঙকরানিরকা তাঙি বেজান কাম করলা। বিভিন্ন উপভাষা অতারে স্বতন্ত্র পরিচয় দেনার
কাজে স্বয়ং সম্পূর্ন নাইসে উপভাষা অতারেও ভাষা কেন্দ্রিক জাতীয়তাবোধ হঙকরিয়া ভাগ করানির কাজে কাম করলা বারো অনেকাংশে
সফল ইসিলা। ভারতীয় উপমহাদেশে উপভাষা কেন্দ্রিক জাতীয়তাবোধ হাবিত্ত বেশি কাম করিছেগো জর্জ আব্রাহাম গিয়ার্সনর
Linguistic Survey of India (1903)। ১৬
যেগোর পরে মৈতৈ বেইবুনিয়ে আমার ভাষা আলাদা অনারকা আমারে মণিপুরী নাবে মাতানি অকরলা।
মণিপুরী অতা আদিবাসী প্রকৃতি ধর্ম(আপোকপা) অনুসারী মাতিয়া মিছা পরিচয় দেনার কাজে চক্রান্ত করলে আমার বিষ্ণুপ্রিয়া
মণিপুরী সমাজর তনু সিংহ সহ মৈতৈ বেইবুনিয়ে মিলিয়া সুরমা ভ্যালি মণিপুরী সম্মেলন সিজিল করিয়া যথোপযুক্ত তথ্য প্রমাণসহ
অহন প্রতিবাদ করিয়া বানচাল করেছিলা। মণিপুরীরে হিন্দু ঘোষণা করতে বৃটিশ সরকারে বাধ্য ইসিল। ১৭, ১৮, ১৯
অহন নুয়ারিয়া ইতিহাস বিকৃতি করিয়া নেতিবাচক ভাবে উপস্থান অহন না বেলিয়া মাতানি অকরলা মণিপুরীর আদি ধর্ম আপকপা,
হিন্দু কুচক্রান্তকারী, মিশনারীয়ে তাঙরে মুর খুড়াদিয়া থেঙর পানি পিউয়াদিয়া জাত বেলাসি, এসারে করিয়া যুগে যুগে
নিপীড়িত ইয়া নিজর সংস্কৃতি, আদি ধর্ম হারাসি। সময় অহর মণিপুরীয়ে চাঙ অহন গুরুত্ব নাদলেও এপাগা তার ফল ভোগ করতারা।
মণিপুর পরবর্তী প্রজন্মর মানসিকতার সিন্নাসিন্নি ইল বারো ইংরেজর ডিভাইড এন্ড রুল প্রতিষ্ঠা ইল। যার কারনে অরে ইতিহাস অতা
পাকরিয়া হিন্দু বিদ্দেষী রিভাইভেলিস্ট বুলিয়া ইংরেজী ওয়াহী আগরে আদর্শ মানিয়া উগ্র মতাদর্শর মৈতৈ গোষ্ঠী আহান
নুকুল্লা। বিভিন্ন হিন্দু মতাদর্শী মৈতৈ বিদ্বেষী কর্মকান্ড চালানি অকরলা। রিভাইভেলিস্ট মতাদর্শর মৈতৈ আজি গৌড়ীয়
বৈষ্ণব ধর্ম-দর্শনে কতিহান গস কাহিলা বুললেতে মৈতৈ মণিপুরী বৈষ্ণবাচার্য শ্রীল স্বরূপ দামোদর গোস্বামী মহারাজ
(পূর্বাশ্রমর নাঙহান ড. থৌদাম দামোদর সিংহ) গিরক পারা শুদ্ধ বৈষ্ণব আগোরে বোমা মারিয়া খুন করতে না আলুইসি। গিরকর দোষহান
তা মণিপুরে বৈষ্ণব ধর্ম-দর্শন বারো মণিপুরী বৈষ্ণব-দর্শনর নিদর্শন রাস-রাখোয়ালর পৃষ্ঠপোষকতা বারো প্রচার করিসিল।
২০
সবচেয়ে মজার বিষয়হান বম, ম্রো, পাংখুয়া, লুসাই, খেয়াং, খুমি, কুকি, খাসিয়া, নাগা এতাই সাম্প্রতিক সময়ে আদি ধর্ম
নিয়া কোন চর্চা নাকরতারা, এমনকি তাঙর আদি ধর্মর ইতিহাসউ তি বিসারিয়া নাপেইবে। কিদিয়া আদিবাসী আকতায় আদি ধর্ম নিয়া
জাবর কাটানি বেললা, বারো আমি কিদিয়া এহান্ন আলোচনা কররাঙ? এহেন গবেষনার বিষয় আহান।
ভারতে ১৯৬১/১৯৭৫ মারিত্ত আসাম অবিসি(OBC) লিস্টে ২৬ নং সিরিয়েলে বিষ্ণুপ্রিয়া মণিপুরীর নাঙ বিষ্ণুপ্রিয়া নাঙে বারো
মৈতৈ, বামুন বার পাঙালর নাঙ আসে ১৩ নং সিরিয়েলে মণিপুরী নাঙে। মণিপুরর আইনসভায় ১৯৭৯ সালে পাশ ইসিল "The
Manipur Official Language Bill-1979" বুলিয়া বিল(১০ নং) আহান পাশ করলা যেহাত মাতিসি,
"Manipuri Language means 'Meitei Lon' written in Bengali script and spoken by the majority of
Manipur population". ২১ মাতানি একরের এহেন বিষ্ণুপ্রিয়া মণিপুরী জাতি অহন নিশ্চিন্ন
করানির বিলহান। যেহান বাস্তবায়িতউ ইসিল। কিদিয়া বুললে সংবিধানে মতে মণিপুরী বুলতে মৈতৈ ঠারে অতারতারা অতারেই বুঝার।
যে জাগাহাত আমার গোড়াপত্তন ইসে ক্ষুদ অহাতই আমারে(বিষ্ণুপ্রিয়া মণিপুরী) রাষ্ট্রীয়ভাবে অমণিপুরী বুলিয়া মাতানি অর।
মণিপুরে আমারে বিষ্ণুপ্রিয়া মণিপুরীরে মৈতৈএ মণিপুরী বুলিয়া স্বীকার নাকরতারা, বিষ্ণুপ্রিয়া মণিপুরী ভাষা অহন মণিপুরী
ভাষাহান বুলিয়া স্বীকার নাকরতারা। মণিপুরে মণিপুরী মাতলে তাঙি মৈতৈ ভাষায় অতারতারা অতারে বুঝিতারা, যার কারনে মণিপুরে
নিয়াম বিষ্ণুপ্রিয়া মণিপুরী শান্তিতে থানার কাজে নিজর ভাষাহার বিসর্জন দিয়া মৈতৈ ঠারে অতারতারা। অথচ এর ৬০ বছর আগে
১৮৯১ মারিত স্যার জি.এ. গ্রিয়ার্সন মণিপুর রাজ্যে ১০০০গো বারো সিলেট জেলাৎ প্রায় ২৩,৫০০ বিষ্ণুপ্রিয়া
মণিপুরীর অস্তিত্বের কথা উল্লেখ করেছিল। কিন্তু ১৯৫১ খ্রিষ্টাব্দে জনগণনায় বিষ্ণুপ্রিয়া মণিপুরী জনসংখ্যা
মাত্র ১১৪ জন (মণিপুর রাজ্য)। বর্তমানে নিজর ঠার বেলিয়া খাইর থার দিতারা, দাপা আহানে(বিষ্ণুপ্রিয়া
মণিপুরী) মাততারা আমার আপাবপা বিষ্ণুপ্রিয়া আছিলা আমি এপাগা ভাষাহান মাঙকরিয়া খাইরথার হিকিয়া মণিপুরী ইলাঙ। বারো আরাক
জাত আহার বিষ্ণুপ্রিয়া মণিপুরী মণিপুরে হিপোক্রেসির স্বীকার ইয়া নিজরে মণিপুরী স্বীকার নাকরতারা।
বিষ্ণুপ্রিয়া মণিপুরী নাঙে জাত আহার ইমারঠার এহান কিককো মাঙকরলা অহন আমার বুদ্ধিজীবী আকগউ ক্লিয়ার নামাততারা। কি কি
পলিসি এপ্লাই করানিরকা আজি আমার মানু নিজর থারহান বেললা? আমার বাংলাদেশে হাব্বি বাংলানো ইলেউ ঘরেও নিজর থার অতারারাঙ।
মণিপুরে ঘরেও নিজর থার অতারানি নুয়ারানি অহনতে কিসারে? কিসারে ৮০ বছরর বুড়া আগউ আমার থার নুয়ারের? বুড়া অগরে তাঙর
মানক বাপকে কিতা মাতিসি? খানি মানি আহান পারলা অইসও একরলু অইস। জানে আমার থার নুয়ারানি অহন কিহান? নিজর থারহান কিককো
মাঙইল আজি কিককো খাইর থারহান মাতৃভাষা ইল অহন হারপানি অহনই জাতি আহার কাজে হাব্বিতো ডাঙরহান পারা ইসে।
আরাকউ লেখা তামকরিক..........
মিয়ানমারে আমার মানু লেখক: সুরজিত সিংহ শিশির
ভারতর মণিপুরেত্ত বিভাজনর মানসিকতা বাংলাদেশেও সিতারলো। বাংলাদেশে ১৯৮৬ বারো ১৯৮৯ সালে "বিষ্ণুপ্রিয়ারা মণিপুরী
নয় মণিপুরীরা উপজাতি নয়" এরে ইস্যু অহন তৎকালীন সময় নব্য ব্রেইনওয়াস খাই যুবকদল আহানে আমার বিরুদ্ধে সরকাররাঙ
নোটিশ দিয়াছিলা। যার কারনে আমি মণিপুরী বুলিয়া প্রমান করানির কাজে সরকারর নির্দেশে দিমাউ কমিশন ইসিল। আমি মণিপুরী
পরিচয় অহন প্রমাণ করানিরকা পয়লাকার কমিশনহান। সময় অহর রিপোর্টে আমার মানুর কথা চুটিসৌ আগো তলহাত দিলু:
"ইদানিং মৈতৈ মণিপুরীদের মধ্যে নবশিক্ষিত কতিপয় যুবক মণিপুরী সমাজে প্রবাহমান চিরাচরিত সনাতন ধর্মকে বিকৃত করে
‘আপকপা’ নামে আলাদা একটি ধর্মের পতন ঘটিয়ে নিজেদের খাটি মণিপুরী বলে আখ্যায়িত করার অপপ্রয়াসে লিপ্ত
থাকাতে উভয় সম্প্রদায়ের মধ্যে কিছু বৈরি ভাব জাগিয়ে তোলার জঘন্য কার্যকলাপে লিপ্ত হয়েছে। কিন্তু মৈতৈ সম্প্রদায়ের
বয়স্ক ও অধিকাংশ ধর্মপ্রাণ ব্যাক্তিরা উল্লেখিত ‘আপকপা’ মতাবলম্বীদের মনে প্রাণে ঘৃণা করছে। উল্লেখিত
মতাবলম্বীরা বিভিন্ন গ্রামের বসবাসকারী উভয় সম্প্রদায়ের লোকের মধ্যে তিক্ততা ও মনকষাকষির সৃষ্টি করছে এবং বিভিন্ন
পত্রপত্রিকায়, হাট বাজারে অপপ্রচার শুরু করেছে।”
কমিশনহাৎ আমার প্রতিবেদন অহন হায়হান বুলিয়া প্রমাণ পেইলো। নব্য আপকপাপন্থি খাই বেইবুনির চক্রান্ত বাস্তবায়ন নাইল
কিদিয়া মৈতে বুজন যেতা আসিলা বৈষ্ণবপন্থি অতাই আমার পক্ষে অতারলা, বারো আপকপা অহন বিরোধিতা করলা, পত্রিকাতও তাঙি এতার
বিরুদ্ধে লেখলা। কমিশনে বাংলাদেশ সরকার মৈতৈ বারো বিষ্ণুপ্রিয়া দ্বিয়দাপারেই মণিপুরী বুলিয়া সিদ্ধান্ত দিল। যার কারণে
মণিপুরেত্ত অকরিয়া বাংলাদেশর এরে মতাদর্শর অনুসারী অতাই বাংলাদেশ সরকারর প্রতি অখুশি | কিন্তু আস্তে আস্তে কালর প্রভাবে
৪২ বছরে বুজন অতা মরলা, তাঙর প্রচার প্রচারণা অব্যহত থইয়া এপাগার বুজনে (সময় অহন যুবক) ও প্রায় অধিকাংশ মৈতৈ
বেইবুনিয়ে আদি ধর্ম আপকপা অহনই হাইহান নিঙকরতারা, বারো আমি মণিপুরী নাবে অহন নিকরতারা অতাই প্রবল ইলা। ধর্মকেন্দ্রিক
মতাদর্শত্ত নুকুলিয়া আকপাকে রাস করলাঙ অতাই আজি তঙাল ইয়া ভাষাভিত্তিক জাতীয়তাবোধ অহনরে ডাঙর করিয়া পাঙানর লগে
তিলুইয়া আদমপুর বাজারে আলাদা রাস করানি অকরলা।
এপাগা হাবিত্ত ডাঙর বিষয়হান, মণিপুরর অরে ট্রেন্ড অহন দরিয়া থনার কাজে নতুন প্রজন্ম খাই বেইবুনিয়ে মণিপুরীর
ইতিহাসেত্ব আমি মণিপুরী নাবে অহন বাস্তবে প্রমাণ করানির কাজে লেখতে গিয়া বিষ্ণুপ্রিয়া মণিপুরী সম্পৃত্ত হাব্বি ইতিহাস
বাদ দিয়া হুদ্দা খাইর অতানো ইতিহাস লেখতারা। কিদিয়া বুললে আমার ইতিহাস লেখলে তাঙি আমারে মণিপুরী মাতানি পারাঅর। যার
কারণে মণিপুরর ইতিহাসে বারো বর্তমানে মৈতৈ বেইবুনির লেখায় মণিপুরীর ইতিহাসে আমার কোন ইতিহাস নেই, হুদ্দা মৈতৈর ইতিহাসই
আজি মণিপুরীদের ইতিহাস বুলিয়া ইন্টারনেটে পালুইয়া আছে।
মৈতৈলোন বা মণিপুরী ভাষা ভারতর মণিপুর রাজ্যের সরকারি ও রাজ্যভাষাহান বারো সর্বোচ্চ বিদ্যাপীঠ পর্যন্ত শিক্ষাদানের
মাধ্যম হিসেবে প্রচলিত ভাষাহান। অহন বাদেও ‘মৈতৈ/মণিপুরী ভাষা’ মণিপুর বিশ্ববিদ্যালয়, আসাম বিশ্ববিদ্যালয়,
কলিকাতা বিশ্ববিদ্যালয়, গৌহাটি বিশ্ববিদ্যালয়, ত্রিপুরা বিশ্ববিদ্যালয়সহ আরাকউ বিশ্ববিদ্যালয়ে বারো নয়াদিল্লীর
সাহিত্য একাডেমী মণিপুর, আসাম, দিল্লী, পশ্চিমবঙ্গসহ বিভিন্ন শিক্ষাবোর্ড কর্তৃক অনুমোদিত ভাষাআহান।
ইম্ফালসহ আকাশবাণীর বিভিন্ন কেন্দ্রে মণিপুরী অনুষ্ঠানর প্রচার মাধ্যমে মৈতৈলোন ভাষার অনুষ্ঠান প্রচার করতারা, এহাত
বিষ্ণুপ্রিয়া মণিপুরীর কোন স্থান নেই।
-এ মণিপুরী/ মৈতৈ ভাষাঅহনরে ৩৭ নং ক্রমিকে বারো আমার বিষ্ণুপ্রিয়া ভাষাঅহনরে ১২৪ নং ক্রমিকে পৃথক পৃথক করিয়া দেখা
দিয়াসি। বারো আমার কোডগো ৬৩৯-৩, ভাষাহার নাঙহান বিষ্ণুপ্রিয়া; তাঙর কোডগো ৬৩৯-২, ৬৩৯-৩, ভাষাহার নাঙহান মণিপুরী /
মৈতৈ। ২২
১৯৯২ সালে ভারত সরকার মণিপুরী/ মৈতৈ ভাষা অহনরে ভারতীয় সংবিধানর অষ্টম তপশীলে অন্তর্ভূক্তির মাধ্যমে ভারতের অন্যতম
গুরুত্বপূর্ণ জাতীয় ভাষা হিসেবে স্বীকৃতি দিয়াছে।২৩ ভারত, ২২টি অষ্টম তফসিলভুক্ত ভাষার অন্যতম ভাষাহান
ইলতাই মৈতৈ/ মণিপুরী ভাষাহান। (এরে তপসিলভুক্ত ভাষাঅতার উন্নতিরকা ভারত সরকার সাংবিধানিক নির্দেশপ্রাপ্ত)
মণিপুরী বুলিয়া সার্চ দিলে আহের আর্টিক্যাল অতা খাইর ইতিহাস। এপাগা নুয়া সমস্যাহান দেখরাঙ আমার মানুয়ে
বির্তকে নাগিয়া সস্তা জনপ্রিয়তার লোভে মণিপুরীর ইতিহাস বুলিয়া সার্চ দিয়া খাইর লেখকর লেখা ইতিহাস আহের অতা পাকরিয়া
এপাগা নিজর ইতিহাস বুলিয়া খাইর ইতিহাসনো বেজান চর্চ্চা করতারা, কততাই অতা পাকরিয়া আমি বিষ্ণুপুরিয়া, বারো কততাই নিজর
ইতিহাস মাঙকরিয়া আদি ধর্ম আপকপা বুলিয়া লেখানি অকরলা। বারো খাইর লেখকে আমার ইতিহাস বাদ দিয়া মণিপুরীর ইতিহাস বুলিয়া
লেখিসি অসারে লেখা কপি পেষ্ট করতেগা গিয়া আমি মুড় না খুড়াছি আমার ইতিহাস বেলিয়া, হুদ্দা মুড় খুড়াছি খাইর ইতিহাস
তুলিয়া ধরিয়া আমিও অজান্তেই খাইরেই মণিপুরী বুলিয়া স্বীকৃতি দিয়াদেরাঙ। খাইর লেখা কপিপেষ্ট করতেগা আমি মণিপুরী নাবে
অহন তাঙি নিজেই মাততারাহান পারাইল।
বারো কততাই এতা পাকরিয়া আমারে আমি মণিপুরী নাবে বিষ্ণুপুরিয়া বা বিষ্ণুপ্রিয়া মাততারা। এতা আমার ভবিষ্যত প্রজন্মর
কাজে দিকভ্রান্ত করানিহান পারা ইল। কিন্তু তাঙর পূর্ববর্তী আমার সমাজ কোন ডাঙরিয়া মানুয়ে এসারে কথা না অতারাসি, এপাগা
আসি বুড়াবুড়িরে আঙকরলেউ হারপানি অকরের। আমার দ্বীননাথ অজা, ড. রনজিত সিংহ, মহেন্দ্র কুমার সিংহত্ত অকরিয়া হাব্বিয়ে
আদি বৈষ্ণব অহনিই মাতিয়া গিয়াছিগা। খাই আদি ধর্ম আপকপা বুলিয়া যেহান অকরলা অহনরে সঠিক করানির কাজে তাঙি অহনরে মহাভারত
মণিপুর অহন স্বীকার নাকরতারা, আমার এরে বিপদগামী খাইর অনুসারী লেখক অতাউ তাঙর লগ দরিয়া এহেন মহাভারতর মণিপুর বুলিয়া
স্বীকার নাকরতারা। খাই বিপদগামী আপকপা পন্থীর লগ দরিয়া তাঙিও হিন্দু ধর্ম অহনরে দেখে নুয়াতারা বারো তাঙি খাইর আপকপা
পন্থির অসারে ব্রেইন ওয়াশ ইয়া তাঙি হিন্দু ধর্মততো আলাদাতা নিঙকরতারা।
কিন্তু বাংলাদেশে বা অন্য রাজ্যে এর প্রভাব অহন তাঙি খাটা নুয়ারিসি বুলিয়া বাংলাদেশে আমি মণিপুরী বুলিয়া পালুয়া
আছি।
আদি ধর্ম / লৌকিক ধর্মর নাঙে আমি হিন্দু নাবে বিভাজন অহন কতিহান ঠিকহান?
২০০৭ সালে জটিল ও সূক্ষ্ম বিবেচনার নিরিখে একাধিক মতের বিভিন্নতা ও বৈচিত্র্যর দিকহান বিচার করিয়া ম্যাকড্যানিয়েল
গিরকে হিন্দু (সনাতন) ধর্মর ছয়হান শাখারে চিহ্নিত করিছে। এরে বিভাগঅতা ইলতাই:
লৌকিক হিন্দুধর্ম – বিভিন্ন স্থানীয় ঐতিহ্য ও লৌকিক দেবদেবীর পূজাঅতারে কেন্দ্র করিয়া আঞ্চলিক
বা সম্প্রদায় স্তরর ধর্মবিশ্বাসহান যেহান প্রাগৈতিহাসিক কাল বা অন্তত বেদ রচনা করানির আগেত প্রচলিত ইসেহান।
বৈদিক হিন্দুধর্ম – এরে বিশ্বাসঅহন ইলতা শ্রেণী আহার বামুন (মূলত শ্রুতিবাদী) যেতা সমাজে আজিকাও
প্রচলিত আছি।
বৈদান্তিক হিন্দুধর্ম – এহেন বার উপনিষদর শিক্ষাহার উপর প্রচার ইছেহান। যেমন, অদ্বৈতবাদ
(স্মার্তবাদ)।
যৌগিক হিন্দুধর্ম – এহেন ইলগাতা পতঞ্জলির যোগসূত্র অবলম্বনে প্রচার ইছেহান।
ধার্মিক হিন্দুধর্ম বা প্রাত্যহিক নৈতিকতা – কর্ম ও হিন্দু লহংর সংস্কার বার সামাজিক নিয়ম
নীতিঅতারে কেন্দ্র করিয়া দাঙরিছে শাখাহান।
ভক্তিবাদ – বৈষ্ণবধর্মর অসারেহান যেহান ভক্তিহানরে কেন্দ্র করিয়া ইছে মতবাদহান।২৪
সময় আহাত বৃটিশ সরকার চক্রান্ত করিয়া মণিপুরীরে Tribal বুলিয়া ঘোষণা দিল, উতার প্রতিবাদে মৈতৈ
বিষ্ণুপ্রিয়া বেইবুনি মিলিয়া "সুরমা ভেলী মণিপুরী এসোসিয়েস" হঙকরিয়া সরকারী সিদ্ধান্তর
প্রতিবাদ করিয়া তথ্য প্রমাণসহ বৰ্ণহিন্দু ঘোষণা দেনারকা দাবি করলা। ব্রিটিশ সরকার বাধ্য অয়া মণিপুরীরে বর্ণহিন্দু
ঘোষণা দিল। আকপাকে ভানুবিল কৃষক প্রজা আন্দোলন করিসি।
আমার যে কোন অনুষ্ঠানে তাঙরকা ফিদা থাইল নিমন্ত্রন থাইল। তাঙর অনুষ্ঠানেও আমারকা ফিদা থাইল নিমন্ত্রন থাইল। ১৯৫০ সালের
১৭ মে হক্তিয়াখোলা গাঙে ডাঙর সভা আহাত মৈতৈ বিষ্ণুপ্রিয়া মিলিয়া “পাকিস্তান মণিপুরী ক্ষত্রিয় শান্তি
রক্ষা সমিতি (বর্তমান মণিপুরী সমাজকল্যান সমিতি)" করিসিলা।২৫ যেহানে প্রমাণ করের সময় আহান
ধর্মীয় আদর্শ অহনরে বেসিস করিয়া সমাজ বা জাতি গঠন করিসি। পিসেদে ধর্মীয় আদর্শ বেলিয়া কিসারে তাঙি ভাষাগত আদর্শ অহনরে
ডাঙর করলা অহন গবেষণার বিষয়হান। অহন্ন মাততারা জাতি আহানরে ধ্বংস করতে অস্ত্র বা ক্ষমতা প্রয়োগ দরকার নেই যদি তি তাঙর
ইতিহাস ও সংস্কৃতি বিকৃত ভাবে উপস্থাপন করানি পারর, তাঙরতাই তাঙি লাগিয়া মরতায়। আমার অবস্থা অহন তার বাস্তব প্রমাণ।
▶ তথ্যর লিমঃ
১. মণিপুর ও মণিপুরী; দীননাথ সিংহ ,প্রকাশকাল ৮ নভেম্বর ২০০৩; পৃ:১৩
২.বাংলাদেশের মণিপুরী সমাজ ও সংস্কৃতি, ড. রনজিত সিংহ প্রকাশকাল: অমর একুশে গ্রন্থমেলা ২০১৪ পৃষ্ঠা:
১৯৫
ISBN: 978-984-90864-2-0
৩. সৎজাল, রাজকুমার সানাহল সিংহ পৃ: ৪৪
৪. প্রবন্ধ মাতেক ১ম খন্ড; হেমন্ত কুমার সিংহ প্রকাশকাল: নভেম্বর ২০১৪ পৃষ্ঠা: ১২
৫. বাংলাদেশে মণিপুরী ত্রয়ী সংস্কৃতির ত্রিবেনী সঙ্গমে ২য় মুদ্রন: জুলাই ২০০৬ পৃষ্ঠা:৫৯ ISBN:
984-401-330-8
৬. মণিপুর ও মণিপুরী; দীননাথ সিংহ প্রকাশকাল ৮ নভেম্বর ২০০৩; পৃ:৪
৭. বাংলাদেশের মণিপুরী সমাজ ও সংস্কৃতি, ড. রনজিত সিংহ প্রকাশকাল: অমর একুশে গ্রন্থমেলা ২০১৪
পৃষ্ঠা: ১২৫ ISBN: 978-984-90864-2-0
৮. বাংলাদেশের মণিপুরী: ভাষা ও সাহিত্য, ড. রনজিত সিংহ; প্রথম প্রকাশ ফেব্রুয়ারি ২০২০ পৃ:২, ২১ ISBN:
978-984-93305-2-3
৯. মণিপুরীদের ইতিহাস, শ্রী দীননাথ সিংহ, প্রকাশকাল: জুলাই ২০১৬ পৃষ্ঠা: ১১৯
১০. বাংলাদেশের মণিপুরী: ভাষা ও সাহিত্য, ড. রনজিত সিংহ; প্রথম প্রকাশ ফেব্রুয়ারি ২০২০ পৃ:২, ২৬
ISBN: 978-984-93305-2-3
১১. মণিপুরের প্রচীন ইতিহাস (প্রথম খন্ড), মহেন্দ্র কুমার সিংহ ১৯৬৮ইং পৃষ্ঠা ৫৬
১২. বাংলাদেশের মণিপুরী সমাজ ও সংস্কৃতি, ড. রনজিত সিংহ প্রকাশকাল: অমর একুশে গ্রন্থমেলা ২০১৪
পৃষ্ঠা: ১৫৭ ISBN: 978-984-90864-2-0
১৩. নবখেন্দ্র কত্তৃর্ক রচিত খুমোল পুরাণ অনুবাদক শ্রী নবদ্বীপ সিংহ পৃষ্ঠা: ৩৬
১৪. বাংলাদেশের মণিপুরী সমাজ ও সংস্কৃতি, ড. রনজিত সিংহ প্রকাশকাল: অমর একুশে গ্রন্থমেলা ২০১৪ পৃষ্ঠা:
১৫৯ ISBN: 978-984-90864-2-0
১৫. বাংলাদেশে মণিপুরী ত্রয়ী সংস্কৃতির ত্রিবেনী সঙ্গমে ২য় মুদ্রন: জুলাই ২০০৬ পৃষ্ঠা:২৮ ISBN:
984-401-330-8
১৬. বাংলাদেশের মণিপুরী সমাজ ও সংস্কৃতি, ড. রনজিত সিংহ প্রকাশকাল: অমর একুশে গ্রন্থমেলা ২০১৪
পৃষ্ঠা: ৩১ ISBN: 978-984-90864-2-0
১৭. বিষ্ণুপ্রিয়ার তাম্ফাগী, হরিদাস সিংহ প্রথম প্রকাশ ১৮ ফেব্রুয়ারি ২০১১; পৃষ্ঠা:৪১
১৮. নিংশিং চে - ৮ নভেম্বর ২০২২
১৯. অন্তর মম বিকশিত কর - শারদীয়া ১৪৩০ সিলেটে গনভোট বারো বিষ্ণুপ্রিয়া মণিপুরী সমাজ, ড.
প্রভাত কুমার সিংহ পৃষ্ঠাঃ৮০
২০. প্রবন্ধ মাতেক ১ম খন্ড; হেমন্ত কুমার সিংহ প্রকাশকাল: নভেম্বর ২০১৪ পৃষ্ঠা: ৫৩
২১. ''The Manipur Official Language Bill-1979' (Bill No. 10 of 1979) Imphal, 12th April
1979।
২২. Census of I India 1971-এর Appendix - 11, Mother Tongues-1971 Census
২৩. (The Constitution (78th Amendment) Bill, 1992 (Bill No. 142 of 1992)
২৪. J. McDaniel Hinduism, in John Corrigan, The Oxford Handbook of Religion and Emotion,
(2007) Oxford University Press, 544 pages, pp. 52-53 আইএসবিএন ০-১৯-৫১৭০২১-০
২৫ . বাংলাদেশের মণিপুরী সমাজ ও সংস্কৃতি, ড. রনজিত সিংহ প্রকাশকাল: অমর একুশে গ্রন্থমেলা ২০১৪
পৃষ্ঠা: ১৪২ ISBN: 978-984-90864-2-0
লেখক,
বর্মেন্দ্র সিনহা
পিএইচডি ফেলো, মাইক্রোবায়োলজি
সিলেট কৃষি বিশ্ববিদ্যালয়, সিলেট
0 Comment "বিষ্ণুপ্রিয়া মণিপুরির অরিজিন - বর্মেন্দ্র সিনহা"
একটি মন্তব্য পোস্ট করুন