এস.আই.এল (SIL) নাঙে আন্তর্জাতিক প্রতিষ্ঠান আহান আসে। যেতাই পৃথিবীৎ মৃতপ্রায়ি ভাষা, জনগোষ্ঠী নিয়া বিভিন্ন সার্ভে করতারা। Summer Institute of Linguistics এহানরে সংক্ষেপে SIL মাততারা। তানুর বাংলাদেশে অফিস আগোউ আসে। ২০০২ সালে বাংলাদেশে আদি জনগোষ্ঠী বারো ভাষালো সার্ভে আহান করেসিলা। আমার কমলগঞ্জেও আহেসিলা। অহাৎ, আমার সমাজর সচেতন গাউরাপেই বারো সেবারী কতগই তানুর সার্ভে এহাত্ত আমার ঠার এহানারে হাবির মুঙে উপস্থাপন করানির নিমিত্তে নিয়াম শ্রম দেসিলা। সময় অহাত SIL অর স্পেশালিষ্ট কিম বুলিয়া হেইমাক আহান আহেসিলা। তানু ২০০২ সালে কমলগঞ্জে তানুর কাজ কর্ম আরাম্ভ করেসিলা। সময়অহাৎ আমার ঠারোর গজে হবাকরিয়া হান নাপেইয়া কাম আরাম্ভ করে নুয়ারেসিলা। পরে আমার সমাজর সচেতন মানু কতগই তানুর সার্ভে এহাৎ আমার ঠার এহানার উন্নয়নরকা তানুরে আমার বিষ্ণুপ্রিয়া মণিপুরি ঠার এহান সম্পর্কে অবগত করেসিলা। ২০০৩ সালে আহিয়া তিলকপুর, মাধবপুর, ভানুবিল, ঘোড়ামারা, বিশগাউ মিলিয়া প্রায় হাবি জাগাৎ ক্যাম্প করেসিলা। উদ্দেশ্যহান ইলতাই আমার মানুর ঠারোর স্কুল প্রতিষ্ঠা করানি কতিহান যুক্তিযুক্ত। মানুয়ে এহানরে কিসারে সাই দিতারাতা এহান হারপানি। হেইমাক অহানে হাবি তথ্য নিয়াসিলাগা। আমার সমাজে থাইয়া , আমার ঠার এহান পর্যবেক্ষণ করিয়া। বাক্কা দিন সার্ভে করানির পরে তানুয়ে আমার ভাষার স্কুল স্থাপনকা হেইচা দিলা। তানুয়ে Litreacy programme বারো school project বুলিয়া দুহান প্রজেক্ট দেসিলা। SIL Int. Literacy Consultant Dr. Denis Malone বারো Literacy Co-ordinator Dr. Susan Malone গিরক দ’গির আন্ডারে এরে দুহান ওয়ার্কশপ করানি ইসিল। আমার মানু ১০/১২ গো এহাৎ অংশগ্রহণ করেসিলা। অহাৎ তানুয়ে কিসারে নিজর ঠারে লেরিক লেখানি বারো শিশু রুচিকর অনা অকরের অতা হিকাইলা। এহানাৎ SIL Int. Literacy Specialist Mis. Eunice Tan আ কো-অর্ডিনেটরগো আসিল বারো এসিস্টেন্ট কো-অর্ডিনেটরগোর দ্বায়িত্ব ঘোড়ামারার সুমন সিংহ গিরকরে দিয়াসিলা। ইমার ঠারোর লেরিক লেংকরানি ইল আতে লেখিয়া বারো কতহান কাগজে প্রিন্ট করিয়া। সৌর মুখরূচক করানিরকা আর্ট করানি ইসিল। আর্টে পাংলাক করেসিল মাধবপুরর গিরক সজল সিংহ বারো আরাকউ। লেরিক হংকরানির কন্সেপ্ট বারো প্রকাশর কামে ভানুবিল’র রবি সিংহ, দালুয়ার সুজিত সিংহ, অনিমা সিনহা বারো নগরর অঞ্জন সিংহ বারো আরাকউ কতগই মিলিয়া ইমার ঠারোর প্রাক প্রাথমিক বিদ্যালয় উত্থাপন করেসিলা। এহার চুক্তিহান আসিলতা SIL Bangladesh অর্ধেক পইসা বইতাই বারো বাকি অর্ধেক সমাজর হাবিরাংতো সংগ্রহ করিয়া নিকালানি।
২০০৪ সালে ইমারঠারোর পইলাকার স্কুলগো চালু ইসিল মাধবপুরে। Indigenous Manipuri Welfare Trust নাঙে ট্রাস্ট আগো হংকরেইলা। অহাৎ তাঙর পইসা বারো আমার মানুয়ে যেতা দিতাই অতা হাবি অগোত জমা থয়া কাম চালিয়া যানারকা ইথৌ দিলা। হাবি জল্পনা কল্পনা করানির পরে সফল ইয়া আমার পাঁচহান গাঙে পাঁচগো স্কুল প্রতিস্থা ইসিল। তিলকপুরে ২০০৮ সালে আহিয়া আমার ঠারোর প্রাক প্রাথমিক স্কুলগো প্রতিষ্ঠা ইসিল। মূলত ২০০৪ সালেত্ত ইমার ঠারোর স্কুলর কাম আরাম্ভ ইসিল।
মাধবপুর, ঘোড়ামারা, কালারাইবিল, তিলকপুর বারো ভানুবিলে স্কুল প্রতিস্থা ইসিল। এসারে সুযোগ এহান্তে হাতছারড়া নাকরেসিলা কিন্তু বেশি দিন টিকা নুয়ারলা। আজি ইমারঠারোর কোন স্কুল লেইয়ো বলগা। শিক্ষকর পইসা কড়ি বেতন দেনা নুয়ারলা। ফান্ডগো মজবুত অনা নয়ারিয়া বারো মানুর আগ্রহর অভাবে এহান লেইমাঙ বলগা। আমি কি নাচারাং এহান আরাকমু নুয়া করিয়া আরাম্ভ অক। আমার সমাজে এতো দাঙর দাঙর মানু থাইতে কিয়া এহান সম্ভব নাইতইতা?
লেখক
সুরজিত সিংহ শিশির
তিলকপুর, কমলগঞ্জ, বাংলাদেশ ।
0 Comment "ইমার ঠারোর স্কুল এপাগা কুরাং! - সুরজিত সিংহ শিশির"
একটি মন্তব্য পোস্ট করুন