সম্পাদকীয়
২০১৪ সালেত্ত এরে চে এহান ফংঅর। মি এপাগাউ স্বরণ করুরি পইলাকার চে অহান। আকপাতার চেহান আসিলহান। এরে হুরকাং চে এহান ফংকরানির কারণহান ইলতাই শখের বসে। পাতাহান আকহান। কিতা লেখতে ! আমার মানুর অনলাইন লেখা পাকরিয়া বারো নিজর খানি বুদ্ধি খরচ করিয়া এহানার কড়িগো বুনেসিলু। অহাৎ মি না খালকরিসু যে এহান এসারে দিনাআহাত চাঙ অহান দাঙর করে পারতাঙায় বুলিয়া। ১ পাতার চে এহান জেঠা বেয়ক-বনকনকি যেতায় পূর্ণিমারাসে স্টল দিয়াসিলা তাঙরাং সমজাইলু। নিজর ইচ্ছায় করেসিলু বুলিয়া মি একপাতার চে অহানার কোন সম্মানি মূল্য না থয়াসিলু। যেগরেও বিলাইলু। দ্বিতীয় সংখ্যা অহাৎ বারো লগর মারুপ মাচাং হাবিরে মাতিয়া খানি দাঙর করলাং। ১২ পৃষ্ঠার আসিল। পূর্ণিমা রাসর দুই একদিন আগেত্ত কাম আরাম্ভ করলু। রাসর দিনে বেয়ক বেইবুনির স্টলে দিয়াইলু। পরর মারিৎ মোটামুটি মানানসই লেরিক আহান ফংকরে পারলাং। লগর সাঙ্গ-পাংগ হাবিয়ে চে এহাৎ শ্রম দেনা অকরলা। এসারে করিয়া আজি মানসম্মত পত্রিকা আহান উবা করানি পারলাং। মি না খালকরিয়সু এতসব। এপাগা হারপাউরি, আমার ঠারর চে আহান ফংকরানি এহান হুদ্দা আমার ইচ্ছাহান নাগই এহান মণিপুরি সাহিত্য জগতে চন মুষ্টি আহান বরাদেনা হানউ ইসে। হবা লাগের কোন জাগাত্ত কুরাং আহিলাং এরে রেভোলুশন এহান খালকরলে। মি হাবিত্ত খেয়ালে থৌরিহান আমার সাদে গাউরাপা- পুরিজেলারাং কিসারে এরে ম্যাগাজিন এহান পৌছানি অকরেরতা বুলিয়া। অহান্ন অনলাইন ওয়েবপোর্টাল আগো চেহান আরাম্ভ করানির সূচনালগ্নত্ত হংকরেয়া থসিলু। হাবিত্ত ডিজিটাল বারো নুঙেই করিয়া চা পারানির কাজে এপাগা পর্যন্ত যতহান সংখ্যা নিকালাসিলাং হাবির অনলাইন ভার্সনহানিউ উন্মুক্ত করেদেসিলাঙ। ব্যবসা করানি আমার মূল উদ্দেশ্যহান নাগই। মানুয়ে পাকরে পারলেই লমিল। আমার লেখা যাতে হাবিয়ে নুঙেইকরে পাকরে পারানি ।
এমারি আরাকউ হবা করিয়া অনেক আগেত্ত নিয়াসিলাংগা বার মান সম্মত পত্রিকা আহান ফংকরে পারলাং। নুয়া কতহান ফিচার এমতাগা যোগ করানি অইসে। পইলাকার কথাহান ইলতাই এহান ফ্রীহান। যেকোনগই ওয়েবগোত্ত হমিয়া সহজেই পাকরে পারতাই। চেহার ভিতরে প্রতিটা লেখায় গসহার বাতেদে কিউ.আর কোড (QR code) দেনা অসে। অহাত্ত স্ক্যান করলে সরাসরি ইন্টারনেট ভার্সনহান মানুয়ে চা পারতাই। বারো পূর্ণিমারাসর দিনে পিডিএফ (PDF) আকারেউ ফংকরলাং। PDF ফাইলগো চানা হাদাপেইলে ফাইল www.bit.ly/ningshingche2018 এরে লিংক এহান খিয়ালে থইক। এহান আমার হাবিত্ত দাঙর কামহানি। আমি মানুরাং সহজেই আমার লেখা বারো কামহানি দেখাদে পাররাং।
আমার কাম হুদ্দা পত্রিকাহাৎ নাগই। সামাজিক কামেউ আমি আগুইয়া। প্রতি বছর সুদেষ্ণা দিবস পালন কররাং। হুরকাং পরিসরে ইলেউ হাবিয়ে মিলিয়া বাক্কা হবা করিয়াই এরে ইভেন্ট এহান পালন করররাং।
এমারি আমার চেহাত্ত যেতা রুপা পেইতাঙাই অতা নিদান লেরিক তামকরেকুরা সৌ সুমারারে আমার ফান্ডেত সাহায্য করানির এসারে উদ্যোগ আহান নিয়াসিগা। সাহিত্য সমৃদ্ধির লগে আর্থ-সামাজিক উন্নয়ন আহানউ নিংকরিয়ার। হাবির পাংলাক পেইলে আমি এসারে আরাকউ অনেক সামাজিক কাম সিজিল করে পারতাঙায়। থাকাৎ হাবিরে।
সুরজিত সিংহ
সম্পাদক, নিংশিং চে-২০১৮
0 Comment "সম্পাদকীয় - সুরজিত সিংহ"
একটি মন্তব্য পোস্ট করুন