শ্রী যুগেশ্বর শর্মা
দিপু সিংহ
মানুরকা, সমাজরকা হবা কাম হাব্বিয়ে করে নুয়ারতারা । কিন্তু যেগই করে পারানির মন মানষিকতা থর অগর অরে মন মানষিকতা হাবি মানুর খাজুয়ানিয়ে নষ্ট ইয়া পরেরগা । এহার মধ্যেও যেগোই অতা হাবি চুলকা চুল্কি নাকরিয়া মুঙহানদে আগুয়ানি পারের অগোই চীর স্মরণীয় ইয়া থার । এসারে আমানুর মানুর সমাজে ব্যক্তি আগো ইলতাই “শ্রী যুগেশ্বর শর্মা” । গিরক এগোর জন্ম ১৯১৫ খ্রিষ্টাব্দর কোন দৈব ক্ষণ আহাৎ । গিরক এগো তৎকালীন অবিভক্ত ভারত উপমহাদেশর আসাম প্রদেশ বুলতারা জাগা অহাৎ জন্ম নেসিল । যেহান বর্তমানর হিসাবে বাংলাদেশর সিলেট বিভাগর, মৌলভীবাজার জেলার, কমলগঞ্জ থানার, তিলকপুর গাঙ এহাৎ পরেসে । গিরক এগো জন্ম নেসিলগাতা ব্রাহ্মন পরিবার আহাৎ । গিরকর বাপকর নাঙহান আঙান্তল শর্মা। আঙান্তল শর্মার জিবুতর মধ্যে যুগেশ্বর শর্মা আসিলতা হাব্বিত্ত কনিষ্ঠ সৌগো । সময় অহাৎ তাঙর ঘরগো খুব হিমপিয়া চলেসিল । কৃষি কামর উপর ভিত্তি করিয়া তাঙর সংসার এহান চলেসিল । 
যুগেশ্বর শর্মা অনেক কষ্ট করিয়া ডাঙর ইসে ব্যক্তি আগো । গিরকর আৎহান খুব হবা অসিল ।
গিরকে বাহাসপার মারাগোৎ গিয়া মরকশি লাগিলেও মরকশি ফুটফুটিয়া ফুটিল । তার আতহান ইলতাই পুনশিপালপা আত আহান । ধর্ম কর্মে গিরকর তোলনা নেইসিল । গিরক হুরকাং কালে লেরিক তামকরানির প্রতি আছিল অগাধ ইচ্ছা । লালো শর্মা বারো দয়াময় সিংহ গিরক দুগিরাঙ গিয়া তা লেরিক তামকরিসিল । পাঠ্য লেরিকর লগে গিরকে বেদ-উপনিষদ, গীতা, মহাভারথ তথা- ধর্মীয় লেরিক লেইসুৎ পান্ডিত্যরকা ঔ সময়হানার ডাঙর পন্ডিত আতম্ব শর্মা বারো বীর সিং পন্ডিতরাং গিয়া গুরু নেইকরিয়া বৈদিক সাহিত্য চর্চা করেসিল । বিভিন্ন গুরুরাংতো তা হবা হবা জ্ঞান অর্জন করে পারেসিল । গৃহ কর্মর কাদাহাত সংসারর লগে নিজর লেরিক তামকরানিহান নিজ প্রচেষ্টায় চালিয়া গেসিলগা । গিরকর অক্লান্ত পরিশ্রম বারো নিষ্ঠায় তৎকালীন রানিরবাজার মধ্যবঙ্গ ইস্কুলেতো নরমাল লমকরিসিল । নরমাল লমকরানির পরে তা আরাকউ তামকরানিরকা ১৯৪১ সালে অবিভক্ত ভারতর সিলচরে গিয়া আর্ট স্কুলে ভর্তি ইসিলগা । অহাৎ তা তার শিক্ষা জীবনর হাবিত্ত ডাঙর ডাঙর মুহূর্ত কাটাসিল।
১৯৪৩ খ্রিষ্টাব্দঃৎ আর্ট স্কুলত্ত তা প্রথম শ্রেণীৎ ইয়া পাস করেসিল । তার বুদ্ধি দীপ্তি দেখিয়া আর্ট স্কুলর ভিতরেই তা চাকরির সুযোগ পাসিল । কিন্তু চাকরিকা প্রয়োজনীয় পইসার অভাবে তা আর্ট স্কুলে চাকরি করে নুয়ারিসে । ঘরেত্ত পরে পৌ গেছিল, তা ঘরে যানারকা । ঘরর পৌহান পেয়া তা ঘরর পথে যানাৎ লেপুইল । যানার সময় তা রাজা বীর বিক্রম দেব বর্মার অনুষ্ঠান আহান হাজানির সুযোগ পাসিল । অহাৎ গিরকে বেত, ফুলোর রঙ বারো বেতোর আশলো সুচারু করিয়া হংকরেসিল । রাজা দেব বর্মা আহিয়া হাজাসি ডিজাইন অহান চেইয়া খুব বিষ্মিত ইসিল । পরে যুগেশ্বর শর্মার লগে তিলোয়সিল । তিলোয়া তার আচরণ, নম্রতা দেখিয়া মুগ্ধ ইসিল । তারে নিয়া রাজা গিরকে ঘরে গিয়াসিলগা । যুগেশ্বর শর্মারে রাজা গিরকে খুব বিশ্বাস করেসিল । এসারে বিশ্বাস যে, যুগো এইগা নিজর থতাহাৎ আগে খানারতা দিয়া হয়াৎ ইসে বুললে রাজা গিরকেও থতাহাৎ দিয়াসিল । তা রাজা গিরকর লগে পাচকগো ইয়া ২ বছর যাবৎ আসিল ।
অহাত্ত বাপক নুয়ারা ইয়া পরিলগা । পৌ পাঠুয়ানি ইল । পৌ পেয়া তা ঘরর বারাদে ফিরিল । ঘরে আহিয়া সংসার ধর্ম আরাম্ভ করেসিল । সংসার ধর্মৎ আহিয়া তা লোহং করলো । বাপকউ দৌওর ফামে গেলগা । তার জীবনে হাবিত্ত কষ্টর সময় আহান পার করেসিল অরে সময় অহাৎ । জানা জানির মধ্যে মৌলভীবাজারেত্ত মানু আহিয়া তারে ইস্কুলর শিক্ষকগো করিয়া নিয়োগ দিলা । অহাত্ত তা শিক্ষকতা অহানরে প্রধান পেশাহান করিয়া নেসিলগা ।
শিক্ষকতা তা বিভিন্ন জাগাৎ করেসিল । ব্যাকরণ, পন্ডিত ব্যক্তি হিসাবে তারে নানান জাগাৎ চিনতারা। যে ইস্কুলে তা তামকরেসিল অরে জাগা অহাতই মানে মধ্যবঙ্গ ইস্কুলে শিক্ষকতা করেসিল । অহাত্ত আরাকউ ইস্কুলে তা পন্ডিত শিক্ষকগো বুলিয়া শিক্ষতা করেসিল ।
বৃন্দাবনে আমার মানুরকা যে আখাড়াহান আসে । অহানর উন্নয়ণরকা যুগো ঠাকুর গিরকে বারো লগে কতগোনো গিয়াসিলগা । আখাড়াহান সংস্কার তানুয়ে বৃন্দাবনে গিয়া করেসিলা । বৈষ্ণবী জীবনে তা একাহারী বারো নিরামিষ ভোজন করানি আরাম্ভ করেসিল । শেষ জীবন পর্যন্ত তা আমিষ আহার নাকরেসিল ।
শেষ জীবনে তা মণিপুরি মহারাসলীলা কমিটিত্ত বারো মণিপুরি বৈষ্ণব সম্মেলন বারো আরাকউ জাগাত্ত পান্ডিত্ত পুরস্কার পাসিল ।
এরে পুণ্যচেল্পা বারো আমার মণিপুরির কর্ণধার পন্ডিত গিরক এগো হিন নাপেয়াই ৫ ফালগুন, ১৪২২ বঙ্গাব্দ , ইংরেজিৎ ১৮ ফেব্রুয়ারী,২০১৬ রাতি ৮:১৫ ক্ষেন্তামে একাদশির মতো পূণ্য তিথি আহাৎ গিরক দৌর ফামে গেলগা ।
গিরকরে নিয়া আমার নিংশিং চে হার পক্ষত্ত ডকুমেন্টারী ছবি আহান ফং করতাঙাই । অহান গিরকর বছর সরাতে খানি ডাঙর করিয়া প্রকাশ করানি মনাসি । বছর সরাতে গিরকর মাহাত্য আরাকউ হবা করিয়া হারপা পারতাঙাই । হাবিরে অহারকা বার্তন থইলাং । থাকাৎ ।
0 Comment "শ্রী যুগেশ্বর শর্মা - দিপু সিংহ (নিংশিং চে - ২০১৬)"
একটি মন্তব্য পোস্ট করুন