সম্পাদকীয়
যেপাগা আমি হুরকাং ইয়া আসিলাং অহাৎ হুরকাং হুরকাং করিয়া জিনিস আহান চিন্তা করলাং এপাগা খানি ডাঙর ইলাং খালকরানি হানউ খানি ডাঙর ইল । বারো আরক খানি ডাঙর ইলে খালকরানিহানউ খানি ডাঙর ইতই । অহানই স্বাভাবিকহান । কিন্তু কতিহান স্বাভাবিক অহান তার কামে বারো তার ধরণহাৎ হারপানি অকরের । আগে আমি খালকরলাং সেন্ধা হাৎ ধুপ মেংকুরুক দিলে দৌ হারউ ইতারা । এপাগা হারপারাং ধুপ মেংকুরুক দিলে দৌওর লগে ঘরে নুংশিপা গৎ আগো থার যেহান আমার গারিগোর নুয়ারা থামকরতে পাংলাক করের । ২০১৪ সালোর পূর্ণিমারাসেত্ত আমি এরে চে এহান ফংকররাং । এমতাগানো এহার তৃতীয় সংখ্যাহান ফঙিল । কাম আহান করতে আকখুলা আকখুলিয়ে নার । চে হার লগে অনেকগোই সংযুক্ত আছি । হাবিগীর পাঙলাকে আমার এমতাগার সংখ্যা এহান হবা করিয়া ফংকরে পারলাং এহানই আমার সৌভাগ্যহান ।
স্টল আগোর ব্যাপারে আমি আগে কল্পনাও নাকরেসি । কিন্তু এমতাগা আমি করে পারলাং । বিশেষ করিয়া অতিথি দুগো আমি আনে পারিয়া ধন্য । প্রতি বারেই ইচ্ছা থার আগের অহাত্ত হবা করিয়া আরাকউ করানির । কিন্তু জনবল, সামর্থ, কর্মঠো অনার মানু এপাগা নেই । সৌ আসি সৌওর ধান্দায়, বুজন আসি বুজনর পাতাৎ, পুরিজেলেই-গাউরাপুয়েই আসি নিজর নিজর ধান্দাৎ । অর্থাৎ, আজ্ঞউ আজ্ঞর লগে নেই । সাধুবাদ জানুয়ানির মানুর অভাব নেই , আগ্রহদেখা দেনার মানুর অভাব নেই , লগে থানার মানুর অভাব নেই । কিন্তু মাততারা মাথুইম্পা কামহান করে নুয়ারতারা আজ্ঞউ । আমারতা সাপোর্ট লাগের , লগে থায়া কাম করানির মানু লাগের ।
বিশেষ করিয়া আমারসাদে গাউরাপুয়া পুরিজেলা উদ্যোগী দরকার । এমতাগা আমার প্রধান অতিথিগো “আব্দুল গাফফ্র রনি” গিরকরে বারো অর্থনীতির বডার এগো পাংলাকে বিশেষ অতিথি “সুহেল রানা সুমন” গিরকরে হৃদি ইয়ৌপা থাকাৎ যানুইয়ার । মাধবপুরোর এমতাগার “মহা রাসলীলা কমিটি'রাঙও আমি বিশেষ ভাবে বাধিত । তাঙর সহযোগীতা আমি পাহুরে নুয়ারবাং । আমার চে এহান আমার মানুর ঠারে হারা বছরউ ফংকররাং । পরোর মারিৎ আমি চারাং এহান আরাকউ খানি ডাঙর করানির । আমার চে’হান অনলাইনে পানা অকরের । কিন্তু নিজর কোন ডোমেন বারো হোস্ট নাকরেসি । এমতাগা আমি ডোমেন আগো লনার চিন্তা করিছি বারো ম্যাগাজিন এহান ইমার ঠারোর লগে বাংলা বারো ইংরাজিৎ প্রকাশ করানি খেয়ালে থরাং । আমার চে এহান আরাকউ ডাঙর করতে আমি স্মার্ট ফোনর এপ আহান হংকরানির খেয়ালে থরাং ।
হাবির আশির্বাদ থাইলে আমি করে পারতাঙাই বুলিয়া নিংকররাং । হাবিরে থাকাৎ ।
সম্পাদক
সুরজিত সিংহ
0 Comment "সম্পাদকীয় - সুরজিত সিংহ (নিংশিং চে - ২০১৬)"
একটি মন্তব্য পোস্ট করুন