রাখাল রাস
শ্রাবণী সিনহা
১৮০০ খৃঃ মহারাজা মথুচন্দ্র সিংহ গিরকর সময়ত্ব মণিপুরর রাখাল রাসর য়্যারী পেয়ার। রাসর মূল নায়ক বলরাম কৃষ্ণ দ্বিয়গি। রাখাল রাসে গোপীর কোন ভূমিকা নেই। রাখাল রাসর মূল সারাংশ অইলতায় ব্রজর রাখাল বালক হাবিয়ে গোরাচরণ আয়োজন করিয়া আকপেইত তিলয়া কৃষ্ণ বলরামর অপেক্ষাই থাইলা। অন্যদিকে গো-ধেনু , বাছুর হাবিয়ে মোর তুলিয়া হাম্বা হাম্বা রবে মুর তুলিয়া পথগো চেয়া থাইলা। বহু সময় অপেক্ষা করিয়াও কৃষ্ণ বলরামর দেখা নাপেয়া রাখাল কাতর অয়া, একে অন্যরে মাতানি অকরলা নিশ্চয় ইমা যশোদা, রোহিনী, নন্দ মহারাজাই গোচারনে আনা নাদেছি পাউরি। অনন্তর রাখাল হাবিয়ে সিদ্ধান্ত লয়া নন্দালয়ে ধীরে ধীরে গমন করানি অকরলা । নন্দালয়ে গিয়া কৃষ্ণ বলরাম দ্বিয়গিরে সম্বোদন করিয়া ডাহানি অকরলা। অন্যদিকে যশোদা, রোহিনীয়ে ব্রজর রাখাল হাবির নৃত্য, সঙ্গীত, রব(সুর)শ্রবণ করিয়া ঘরেত্ব নিকুল্লা। ব্রজর রাখাল হাবিয়ে যশোদা, রোহিণী দ্বিয়গিরে দর্শন পেয়া কৃষ্ণ, বলরাম গোচারনে যানার নিমিত্তে নৃত্য সঙ্গীতে কেথক করিয়া কাকুতি মিনতি করানি অকরলা। রাখালর অনুরোধে ইমা যশোদা রোহিণীর মণ গলিল। যশোদা রোহিণীয়ে মহারাজ নন্দরাং যাত্রা করলা। যশোদা রোহিণীয়ে মহারাজ নন্দরাং উনা অয়া রাখাল হাবির গোরাচরন য়্যারী অবগত করলা। রাণী দ্বিয়গির অনুরোধে রাজা নন্দই কৃষ্ণ বলরামরে গোচারনে যানার অনুমতি দের। রাজা নন্দর য়্যাথাং পেয়া ইমা যশোদা রোহিণীয়ে বালক কৃষ্ণ বলরামরে মনের মত করিয়া হাজাদিয়া মাখন, ননী, লারৌ আদি রাখাল ব্রজর বালক বারো কৃষ্ণ বলরামরে ভোজন করোয়েইল। অবশেষে ইমা যশোদা রোহিনীয়ে বালক কৃষ্ণ বলরামরে রাখাল হাবিরাং সপিয়া বারে বারে সম্বোদন করিয়া মাতানি অকরলা। 
“নীলমনি রতন ধন রাখিয়,
আগে না পাঠায় পাছে রাখিয়,
আমারি অঞ্চলর মণিরে মধ্যেতে রাখিয়।”
0 Comment "রাখাল রাস - শ্রাবণী সিনহা (নিংশিং চে - ২০১৬)"
একটি মন্তব্য পোস্ট করুন