পুং তত্ত্ব (ঢাক)
রনি সিংহ
১৫৪ খ্রিস্টাব্দত মনিপুরর গন্ধর্ব রাজ্য ‘খুয়োই তোমলোক’ গিরকে চর্ম বাদ্য যন্ত্র অর্থাৎ ঢাক এগ আবিষ্কার করেছে বুলিয়া মনিপুর ইতিহাস উল্লেখ আছে। মহাভারতে মনিপুররে গন্ধর্ব রাজ্য বুলিয়া অভিহিত করেছে। গন্ধর্ব মানে নিত্য সঙ্গীত বিদ্যায় পারদর্শী উপ দেবতা। স্বর্গর অপ্সরা তথা শিব পার্বতীর কৃপা প্রাপ্ত জাতহান। মনিপুরে ঢাক এগরে পুং বুলতারা। ঢাক(খুল)-এগরে ভাগবত ও পুরান তত্ত্বত শ্রীকৃষ্ণ অঙ্গ বুলিয়া প্রকাশ করেছে। ঢাকুলা(বাদক)-শ্রীমতি রাধিকা স্বরূপ। রাধার হস্ত স্পর্শ মাত্র ভগবান শ্রীকৃষ্ণ প্রেমে বিভুলা অয়া ধ্বনি- প্রতিধ্বনিত প্রেমর আদান প্রদান করের। দুই চুরি(কড়া)-ভগবান শ্রীকৃষ্ণর আতর খারউ (চুড়ি) স্বরূপ। দক্ষীণ বারাদে পার্বতী স্বরূপ উত্তর বারাদে শিবর অস্থি স্বরূপ। মারেই(টানা) , লিহউ-ভগবান শ্রীকৃষ্ণর। ব্রহ্মগ্রন্থী ছিংলেই (নাড়ী)। প্রকাশ করের নিজর নাঙ মহিমা শ্রীমতি রাধিকার আশ্রয় ও অবলম্বনে। কলিজীব উদ্ধারর নিমিত্তে পুং(খুল) রাধাকৃষ্ণের আত্মা-পরমাত্মা প্রকৃতি-পুরুষ সমন্ধ ভক্তি প্রেম রসর যোগসূত্র বিনা সূতার মালা । যেগর ধ্বনি দেহ মন হাবি উজার করিয়া নেরগা। দেহত ভক্তি রস সঞ্চার অর। তত্তঃত্ত প্রকাশ যেবাকা খুল (ঢাক) অঙ্গর দ্বিয় মুখে আতর আঙ্গুলিদ্বারা স্পর্শ করানির লগে লগে নানা ধ্বনি প্রতিধ্বনি সঞ্চার অর। উবাকা ভগবান শ্রীহরির অং প্রত্যঙ্গ জাগিয়া উঠের(হজাক)অর। রাধার প্রেমে ব্যাকুল অর। তথা ভক্তর অধীন ভগবান গোলোকে থা নুয়ারের লগে লগে শ্রীহরি আহিয়া সংকীর্তনে অবস্থান করের। স্কন্ধ পুরানে ভগবান শ্রীহরিয়ে নারদরাং মাতেছে-
শ্লোক(স্কন্ধপুরান)
“নাহং তিষ্ঠামি বৈকুন্ঠে নচ যোগানাং হৃদয়ে।
মদ্ভক্তা যন্ত্র গায়ত্রী তত্র তিষ্ঠামি নারদঃ।”
অর্থাৎ, হে নারদ মি বৈকুন্ঠে নাথাওরী যোগীঋষির হৃদয়েও নাথাওরী। যেপেইত মোর ভক্তই মোর গুন গান করতারা ঔপেইত মি অবস্থন করৌরি।
ভক্তই হরি শংকীর্তন যেপেইত করতারা ঔপেইত ভগবান থার। খুল(পুং)-মন্ত্র উচ্চারন করিয়া জীব ন্যাস-প্রাণ প্রতিষ্ঠা করানি থক। নাইলে রাগ মূর্তিপাল নার। হরি সংকীর্তন পূর্নাঙ্গ নার, পবিত্র নার। হরি সংকীর্তনর ভাব রস সঞ্চার নার। খুমেল পুরানে ঢাক(খুল) এগো মনিগো বুলিয়া মাতেছে নাঙহান য়াইবুং। ভগবান শ্রীবিষ্ণুয়ে কৌওয়া রূপ ধরিয়া অসহায়আতিয়াগুরুরে(লিকলাখম্বা/কাংলারে) কৃপা করিং বুলিয়া বনে দান করেছেগো। যেগর কৃপাই আতিয়াগুরু নুঙ্গেই অয়া রাজা পালয়া সুনাম অর্জন করেছিল। আমার ঢাক এগ ৪২ মারই(টানা) লাইহৌ আছে।অর্থাৎ ৬(ছয়) রাগ ৩৬(ছয়ত্রিশ) রাগিনীপূর্ণ। মণিপুরে লাই হোউ বুলতারা লাই মানে দৌ,হৌ মানে উঠানি(হজাক করানি)। পরে খুমেল তোমুর রাজত্বকালে খুলা বেয়ক খুমেল আতলে চর করিয়া মৈতৈ রাজারাং দের। বহুদিন পর মৈতৈ রাজা পামহৈবা(গরীব নেওয়াজ) বারো খুমেল রাজা মৈমুরে বৈষ্ণব ধর্মত দীক্ষা লয়া হরি উৎযাপন করতে হপনে ঔ ঢাক(পুং)ঔগই দেহুয়েয়া নাম সংকীর্তনে পালা কীর্তনে রহাছি। আমার ঢাক (পুং) এগো অন্য সমাজে নেই।
ন্যাস মন্ত্রঃ
“খ্রীং দ্রীং চ্রীং স্বাহা”
এ মন্ত্র সলকরিয়া ১(দশ)বার খুল(পুং)জীবন্যাস করানি থক।পিছেদে গায়ত্রী জপ করিয়া ১২(দশ)বার মাথিয়ানি থক। পুনিং চিলয়া।
মন্ত্রঃ
“ক্লীং মৃদঙ্গায় বিদ্মহে নিরাকারায় ধীমহি তন্ত মৃদঙ্গং প্রচোদয়াৎ”
ঔহান অইলে ভগবান শ্রীহরি খুল(পুং) গত আহিয়া অবস্থান করিয়া হরি সংকীর্তন উৎযাপন কালে রাগ রাগিনী সঞ্চারে নিজর কীর্তন নিজে করিয়া, ভাবক বৈষ্ণব ভক্তরে প্রেম বিতরন করের। রাধার অবলম্বনে ও রাধারে আশ্রয়। তিন বাঞ্ছার মাধ্যমে প্রকাশ নাম রূপে। বিধিখুল(পুং) দুগই বাজানি থক।কারন প্রকৃতি পুরূষ ছাড়া প্রেমর সঞ্চার নার।অর্থাৎ ভাব ভক্তি সমন্ধ নাইলে ধ্বনি নার।
বায়ুরূপে শ্রীহরিশক্তি রূপে দ্বিয়গির প্রেম স্পন্দনে-ই থার তরঙ্গ (বায়ু) লহরীত মধুর
শব্দ(ধ্বনি) বাহিয়া কানর রন্ধ্রে ভাবক বৈষ্ণব ভক্তর হৃদয়ে প্রবেশ করিয়া প্রেম ভক্তি রস বিতরণ করের। তত্ত্বত্ত প্রকাশ পার-বায়ু ভগবান শ্রীহরি জগত ঈশ্বর। প্রভুরাং আশ্রয় অবলম্বনে সপ্ত জগত বিরাজমান। ভগবানর শক্তিই শ্রীমতি রাধিকা আশ্রয়ে ও অবলম্বনে হরির প্রেম বিতরন করের।
0 Comment "পুং তত্ত্ব (ঢাক) - রনি সিংহ (নিংশিং চে - ২০১৬)"
একটি মন্তব্য পোস্ট করুন