করতাল তত্ত্ব
সঞ্জয় সিংহ
ভাগবত,বৃহৎ সারাবলী,প্রভাস খণ্ড,নারদ পঞ্চ রাত্র,আদিত করতাল এহানরে শ্রীমতি রাধার অঙ্গ বুলিয়া প্রকাশ করেছি। তথা খুমেল পুরানে মহারাজ দত্তমণি সিংহই ভগবান শ্রীবিষ্ণু নিংকরানির সময় অহাত করতাল এহান রহেয়া ভগবানর গুণ কীর্তন করেছে বুলিয়া উল্লেখ আছে।পূর্ব্ব জন্মে ভগবান শ্রীহরি রাধা রাণীরে ধরাধামে জরম অনার য়্যাথাং করলে শ্রীমতি রাধিকাই প্রভুর সেবা ও সঙ্গত্ব দূরেইত থানাত পরতই। ঔহান হারপেয়া আতজোড় করিয়া নিবেদন করানি অকরল। হে প্রভু যদি মি ভবত গিয়া জরম অউরিগা অহান অইলে প্রভুর সেবা ও প্রেমেত্ব বঞ্চিত অইতৌ। গতিকে প্রভু মরে এ বর এহান দে, করতাল রূপে জরম অইংগা। 
ভাবক,বৈষ্ণব,সম্প্রদায় ইসালপা,দোহার,পালায় (পরিষদে) তর গুণ গান মহিমা প্রকাশ করতাই ঔবাকা তানুর আতে অবস্থান অয়া প্রভুর গুণ গান মহিমা তাল মান,লয়,ছন্দ প্রকাশ করিং। ভক্তর অধীন ভগবান। ভক্তর দুঃখ হারপেইল।
ভক্তর আশা পূরনরকা বর দিল। বর মতে রাধা করতাল রূপে ভবে জরম অইরী। ঔ বর মতে ভক্ত,ভাবক,বৈষ্ণব আদিয়ে হরি সংকীর্তন উৎযাপনকালে করতাল ধরিয়া রাগ-রাগিণী সঞ্চারে কীর্তন করতারা। ভগবানর গুণ মহিমা পান করতারা। করতাল দ্বিয়হানি –শ্রীমতি রাধিকার বক্ষ স্বরূপ। করতাল বাজনে ভক্তি প্রেম হৃদয়ে সঞ্চার অর। ভাবক,বৈষ্ণব সাধু,ইসালপা (গায়ক)দোহার, পালা পরিষদে আত দ্বিয়হানিল ধরিয়া বাজেইতারা ঔবাকা বায়ুরে অবলম্বন ও আশ্রয় করিয়া বায়ু তরঙ্গর ডেউত প্রবাহিত অয়া প্রেম বিলেয়া কৃষ্ণ প্রেমে আকৃষ্ট
করের।করতালর জতা-শ্রীমতি রাধিকার বেণী স্বরূপ।ঔ তত্ত্ব অবলম্বনে করতালর জাতা এক আত দীঘল বারো আলাদা বেজুরি (রংর) সূতাল সাজেইতারা। আতল ধরানির জাগা ঔহানীত কালা ফুতিল বেরেইতারা।অর্থাৎ জুরা বন্ধন।
বিধি:
করতাল জীবন্যাস করানি থক। নাইলে মূর্তিগ পাল নার। রাগ-রাগিনী,তাল মান ,লয় প্রকাশে ব্যাঘাত অর।
ন্যাস মন্ত্র
খ্রীং স্রীং দ্রীং হ্রীং স্বাহা।
এ মন্ত্র সলকরিয়া বাদক গিরকে ১২(দশ) বার মাথিয়া জীবন্যাস করানি। পরে ১৬(ষোল)নাম বত্রিশ অক্ষর মূল মন্ত্র উচ্চারণ করিয়া চৈতন্য নিতাই বুলিয়া তিনমাউ সলকরানি। শ্রীমত রাধারে পুংনিং চিলয়া ভক্তি করিয়া রাধার স্বরণে মূলমন্ত্র উচ্চারণ করিয়া হৃদয়ে জপিয়া বহানি থক। ঔহান ঐলে হরি সংকীর্তনর রাগ সঞ্চার পূর্ণাঙ্গ অর।তাল,মান ভঙ্গ নার বুলিয়া তত্ত্বই মাতের। রাধার রূপ করতালর বাজনে ভগবান বৈকুন্ঠে থানুয়ারিয়া রাধার প্রেমে বিভুলা অয়া হরি সংকীর্তনে অবস্থান করিয়া প্রেম বিতরন করের। নিজর নাম নিজে প্রজার করিয়া কলির জীব উদ্ধার করের।
0 Comment "করতাল তত্ত্ব - সঞ্জয় সিংহ (নিংশিং চে - ২০১৬)"
একটি মন্তব্য পোস্ট করুন