Ningsing An Information Repository
 |
| ফটকঃ নিংশিং চে |
ভূমিকাঃ
আমার সমাজর প্রগতিরকা আমি গাউরাপেই কতগই মিলিয়া ইমার ঠারে বৎসরে আকমু এরে হুরকাং চে এহান প্রকাশ কররাঙ হান । গেলগা আগের ১৭২ তম রাস পূর্ণিমাত্ত এরে বাৎসরিক চে এহান প্রকাশিত অরহান । এমতাগা আগের নিংশিং চে’হার তুনো খানি দাঙর করানি ইসে । এরে চে এহান “বাংলাদেশ যুব মণিপুরি বিজ্ঞান ও প্রযুক্তি সংগঠন” অর শাখা আহান । সংগঠন এহার মাড়াগো ধরিয়াই এরে সাময়িকী চে এহান প্রকাশিত অর প্রতি বছরে বছরে । আমারতা খুব ইচ্ছা আছে চে এহান দাঙর করানির । আপনাআছির আশির্বাদ বারো সাহায্য সহযোগীতা পেইলে আমি চে এহান আগামী বছরর রাস পুর্ণিমা’ত আরাকউ দাঙর করানির হপন দেহেসি ।
সম্পাদকীয়ঃ
“কালে কালে কালর কথা নাহুনানি নাকরের,
জিগয় বনহান
পুড়িয়া আনলে কাচায় মজায় নাধরের।”
গিরকে মাতেগেছেগা কথা আহান । কালর লগে আমারতাও পরিবর্তন অনা লাগতই । নাইলে আমি কালর খেয়াগোর লগে লিম্পা গাতগোত হমাবরতাঙই । অতায়া আমি হাবি মিলিয়া বিজ্ঞান বারো প্রযুক্তিগত ভাবে মুঙেদে আগুআনি লাগতই । আমি গাউরাপুয়েই কতগই মিলিয়া সাংগঠনিক ভাবে কালর খেয়াগোর লগে মুঙেদে আগুআনির পথ আগো খুলেছি । কিন্তু হবাকরিয়া প্রতিস্থিত নাইসে বুলিয়া হাবির মুঙে আমি নাহেসি । “বাংলাদেশ যুব মণিপুরি বিজ্ঞান ও প্রযুক্তি সংগঠন” সংগঠন এহান ২০১২ সালোর ডিসেম্বর অর ১২ তারিখে যাত্রা আরাম্ভ করেছেহান । হয়তো, পুরাপুরি প্রতিস্থিত ইতে ইলে আরাকউ কত বছর লাগতই । কিন্তু সমাজরকা সময়র লগে হুরকাং হুরকাং কাম আকিহান করানির প্রতিশ্রুতি থরাঙ । যেমন, এরে “নিংশিং” চে এহান । মুঙহানদে আমার আরাকউ প্রোজেক্ট আহান আছে । বিজ্ঞান বারো প্রযুক্তি মেলা আহান করানির । হাবির আশির্বাদ থাইলে আগামি বছরে করানি মনাসি । হুদ্দা লেরিক তামকরলেই লম নাইবো । লেরিকর লগে আমার সমাজর নানান তথ্য হারপানি বারো বিষ্ণুপ্রিয়া মণিপুরির ইতিহাস বারো আমার সমাজর বিভিন্ন হবা হবানেই দিকহানি চেয়া অহার ব্যবস্থা নেনা লাগতই । অহান আমারসাদে যুবকর কামহান । আমি নাকরলে আকগউ নাকরবা । মূলকরিয়া, এরে উদ্দেশ্য এতানো আমি এরে হুরকাঙ চে এহান নিকালারাঙহান । আমারতাবুলিয়া কোন সরকারী বারো বেসরকারী ফান্ড নেই অহান্য আমি স্বল্প বাজেট নো এরে চে এহান হংকরিয়ার । কারণ, আমি হাবি শিক্ষার্থী । যেতা রুপাকড়ি পারাঙ অতাত্ত খানি থয়া থয়া এহান হংসেহান । আমার এরে চে এহানাৎ লেখা লেখিরকা বারো আর্থিক পাংলাকরমা আপনাআছির সাহায্য চারাঙ । এহারকা আমি ইন্টারনেটে ব্লগ আগো খুলেছি । অহাত হাবি যৌওদিয়া মনর কথা বার্তা শেয়ার করিক । ওয়েবগোর লিঙ্কহানঃ NingSingche.Blogspot.Com বারো আমার ফেইসবুকর গ্রুপহাত (এহাৎ) হমিয়া কথা বার্তা শেয়ার করিয়া সংগঠন এহান সাতকরেদিক । হাবিলমিয়া ১৭৩ তম এমতাগার মহা রাসপূর্ণিমা এহান যাতে সফল ওকে ঔহান কামনা থাইল । হাবিরে থাকাৎ... ।।
(সম্পাদকঃ বাযুমবিপ্রস বারো নিংশিং চে)
0 Comment "ভূমিকা বারো সম্পাদকীয় (নিংশিং চে-২০১৫) [সালনি]"
একটি মন্তব্য পোস্ট করুন